Шайгу спрабуе пераканаць Захад спыніць вайсковую дапамогу Украіне

Міністр абароны Расіі Сяргей Шайгу, верагодна, імкнуўся запаволіць або прыпыніць ваенную дапамогу Захаду Украіне. Так ацэньваюць званкі расійскага міністра заходнім калегам у Інстытуце вывучэння вайны.

Нагадаем, у выходныя Шайгу звязваўся праз тэлефон з некалькімі міністрамі абароны і пераконваў іх, што Украіна рыхтуе атаку з выкарыстаннем "бруднай бомбы" пад фальшывым сцягам супраць Расіі. Шайгу ўчора тэлефанаваў кіраўнікам ваенных ведамстваў Францыі, Турцыі, Вялікабрытаніі і Злучаных Штатаў. Прадстаўнікі ЗША, Злучанага Каралеўства і Украіны ўжо катэгарычна абверглі і асудзілі гэтыя абвінавачванні Шайгу, назвалі іх ілжывымі.

Пры гэтым у Інстытуце мяркуюць, што "Крэмль наўрад ці рыхтуе немінучую атаку бруднай бомбай пад фальшывым сцягам". А гэтыя заявы Шайгу "працягваюць даўнюю расійскую інфармацыйную кампанію". Эксперты нагадваюць, што ў Маскве неаднаразова заяўлялі пра намер заходніх дзяржаў дапамагчы Украіне правесці падобную атаку. Пра тое, што Украіна рыхтуецца да ядзернага нападу на Расію, казаў перад пачаткам вайны прэзідэнт  Уладзімір Пуцін. А расійскія дзяржаўныя СМІ неаднаразова распавядалі, што заходнія дзяржавы дапамагаюць Украіне ў распрацоўцы ядзернай зброі.