З кім сустракалася місія МВФ?

З 5 кастрычніка ў Беларусі працуюць эксперты Міжнароднага валютнага фонда. Галоўная мэта місіі гэтым разам — постпраграмны маніторынг. Але, па словах віцэ-прэм’ера Сяргея Румаса, практычна адмыслоўцы з МВФ будуць працаваць над новай праграмай з Беларуссю.

Еўрарадыё вырашыла высветліць, з кім цягам апошняга тыдня сустракаліся эксперты МВФ, і якія пытанні абмяркоўвалі.

“Як заўжды, місія МВФ сустракаецца з аднымі і тымі ж ведамствамі, якія адказваюць за эканамічныя пытанні. Іх кола вузкае: Нацбанк, Мінфін, Саўмін…” — паведамілі Еўрарадыё ў беларускім прадстаўніцтве Міжнароднага валютнага фонда. І дадалі, што, кіруючыся правіламі арганізацыі, не маюць права каментаваць працу місіі да яе заканчэння:

“Місія працуе. 17 кастрычніка раніцай будзе брыфінг”.

Крыніца Еўрарадыё ва ўрадзе паведаміла, што на мінулым тыдні супрацоўнікі місіі МВФ сустракаліся з прадстаўнікамі трох міністэрстваў: эканомікі, фінансаў, працы і сацыяльнай абароны насельніцтва. Падчас сустрэчы чыноўнікі прадставілі міжнародным экспертам, у прыватнасці, план беларускай прыватызацыі на 2012 год.

Але Міністэрства фінансаў, якое каардынуе працу экспертаў МВФ у Беларусі, таксама адмаўляецца даваць каментары да 17 кастрычніка. Менавіта ў гэты дзень місія плануе з’ехаць з Беларусі.

Доктар эканамічных навук, акадэмік Пётр Нікіценка мяркуе, што праца місіі МВФ у Беларусі незаўважная, бо эксперты фонда не могуць сказаць нам нічога новага.

Пётр Нікіценка: “А якія ў іх рэкамендацыі? Сацыяльныя выдаткі прыкрыць. Пенсіі і заробкі закансерваваць. Кошты адпусціць. Што ў гэтым новага? Пра што бачу — пра тое і спяваю… Ну, кажуць, давайце ўмацуем долар: вы эмісію сваю спыніце і зрабіце манетарнасць сваёй эканомікі на нацыянальнай грашовай сістэме мінімальнай. Што мы і робім, прыслухоўваемся да іх. То бок, працуем на ўмацаванне долара”.

Больш за тое: на думку эксперта, у медыях сітуацыя з крэдытам ад Міжнароднага валютнага фонда перагорнутая з ног на галаву. Насамрэч гэта не Беларусь робіць усе намаганні, каб атрымаць грошы ад МВФ, а, наадварот, МВФ ганяецца за намі, каб мы ўсё ж такі ўзялі крэдыт.

Пётр Нікіценка: “Нам гэтыя крэдыты, як кажуць, да фені. Можам узяць, а можам не браць. А каму яшчэ даваць, акрамя нас? Грошай у свеце навалам! Фінансавыя, банкаўскія сістэмы ўсе працуюць на гэтым фіктыўным капітале. А праблема нашая не ў грошах, а ў змяненні структуры самой эканомікі. У нас ёсць дастатковыя ўнутраныя рэсурсы, якія трэба ўводзіць у дзеянне. Але яны не ўведзеныя”.

Нават шкада, што па кансультацыі да акадэміка Пятра Нікіценкі эксперты МВФ не звярталіся.

Не звязваліся гэтым разам эксперты МВФ і са стваральнікам сайта prokopovi.ch. Нагадаем, падчас мінулага візіту ў ліпені місія запрасіла ў “Пракаповіча” статыстыку па рыначным курсе беларускага рубля. Аднак з адкрыццём дадатковай сесіі на Беларускай валютна-фондавай біржы гэтыя зветскі можна атрымаць і ў Нацбанку. Да таго ж, рэзкае (на 610 рублёў за 3 дні таргоў) умацаванне долара можа быць звязана менавіта з жаданнем Нацбанка прадэманстраваць экспертам МВФ валютны рынак па-беларуску.

“Адна з версій [таго, як праходзяць таргі на дадатковай сесіі біржы. — Заўв. Еўрарадыё] — гэта абсалютна рынкавая з’ява. З’явіўся попыт, зменшылася прапанова, і курс расце. А другая версія такая: “рынкавасць” дадатковай сесіі нашыя ўлады дэманструюць адмыслова для МВФ, — кажа аналітык афіцыйнага партнёра “Альпары” у Мінску Вадзім Іосуб. — Бо калі тры тыдні запар долар падаў, гэта выглядала абсалютна непраўдападобна. А зараз у іх ёсць аргумент: глядзіце, долар то падае, то расце. Нармалёвыя ваганні — нармалёвы рынак. І паспрачацца тут, уласна кажучы, няма з чым”.

Але другая версія так і застанецца здагадкай: фактаў на яе карысць няма. Як няма і гарантый таго, што рост долара працягнецца пасля 17 кастрычніка, калі з Беларусі з’едзе чарговая місія МВФ.