Як запісацца на прыём да міністра?

Запісацца на прыём да беларускага міністра не складана: набіраеш нумар і запісваешся. Але ёсць адно “але”: за месяц усе яны прымаюць толькі адзін дзень. І дзень гэты — 1-я серада кожнага месяца.

Таксама трэба мець на ўвазе вось што. Проста так да міністра не запішуць — абавязкова запытаюцца, хто вы і адкуль. Папросяць назваць і пытанне, з якім збіраецеся звярнуцца да чыноўніка.

Тэлефаную ў Міністэрства эканомікі:

— Запішыце, калі ласка, на прыём да міністра!

— Прыём у 1-ю сераду кожнага месяца. Можна запісацца на 6 ліпеня, на 14:20-14:30.

— Давайце.

— З якім пытаннем вы ідзеце за Мікалая Генадзевіча?

Сп. Снапкова мы паспрабуем распытаць пра тое, якія вынікі прынесла адмена ліцэнзіяў на 16 відаў дзейнасці, што адбылася паўгода таму. Цікава, ці шмат новых прадпрыемстваў адкрылася пасля таго, як ліцэнзіі замянілі на атэстаты і сертыфікаты.

“Патэлефануйце 5 ліпеня, каб удакладніць, што запіс захоўваецца. Бо самі разумееце: могуць быць якія-небудзь нарады… Але калі што-небудзь памяняецца — мы вам ператэлефануем”, — дадалі ў Міністэрстве эканомікі.

Без аніякіх праблем атрымалася запісацца і да міністра інфармацыі Алега Праляскоўскага. Так што 6 ліпеня давядзецца пабегаць!

“Па пытанні 75% музыкі ў эфіры радыёстанцый… 06.07 у 10:30 чакаем вас, Павел Леанідавіч!”

Па колькасці нумароў тэлефонаў, змешчаных на сайце, можна меркаваць аб адкрытасці таго ці іншага міністэрства.  На сайце Міністэрства адукацыі я здолеў знайсці толькі адзін нумар. Але той, што трэба! Тэлефаную ў прыёмную міністра Сяргея Маскевіча.

— Добры дзень!

— Добры!

— Гэта Міністэрства адукацыі?

— Так.

— Скажыце, калі ласка, ці можна ў вас запісацца да міністра на прыём?

— Тэлефон 222 64 58.

Але па названым нумары слухаўку так ніхто і не зняў. Ну і ладна, спрабую запісацца да міністра аховы здароўя Васіля Жарко:

— Алё, — адказваюць мне.

— Добры дзень, — кажу я. — Гэта Міністэрства аховы здароўя?

— Што вы кажаце?

Высветлілася, што змешчаны на сайце Мінздароўя тэлефон аддзела лістоў і прыёма грамадзянаў 222 60 46 не адпавядае рэчаіснасці. Але мы свайго намеру не кідаем і працягваем тэлефанаваць.

— Падкажыце, калі ласка, калі можна запісацца на прыём да міністра?

— У ліпені міністр ідзе ў адпачынак.

— І калі тады?

— Жнівень! — адказвае супрацоўніца міністэрства ўжо на беларускай мове.

Што ж, будзем чакаць.

На сайце Міністэрства архітэктуры і будаўніцтва адкрытая інтэрнэт-прыёмная. Адказ на запыты праз сусветнае сеціва чыноўнікі абяцаюць даць у тэрмін, прадугледжаны законам, — 14 дзён. Паралельна — у першую сераду месяца — прымае міністр Анатоль Нічкасаў.

На сайце Міністэрства энергетыкі дзейнічаюць вельмі сціслыя і лаканічныя правілы прыёма:

Да міністра культура Паўла Латушкі людзі ідуць, як да добрага цара. Адны прэзентуюць свае творчыя калектывы, другія прыносяць ідэі фільмаў, трэція просяць заступіцца за помнік культуры, чацвертыя даюць паслухаць свае песні і кажуць: "Хачу абавязкова ўдзельнічаць у канцэртах!". Пятым не падоўжылі кантракт…

“Ёсць людзі, якія хацелі б працаўладкавацца. І такіх людзей дастаткова! Я нават здзіўляюся: прабачце, але чаму міністр, калі ён, напрыклад, не ведае вашай творчасці, павінен казаць: вось гэты тэатр ці вось гэтая філармонія павінна ўзяць на працу менавіта вас? Гэта няправільная пазіцыя. Міністр культуры працаўладкоўваць не мусіць!” — распавядае Еўрарадыё памочнік міністра культуры Алег Скарына.

Памочнік Паўла Латушкі кажа, што ад наведвання міністра чалавек абавязкова мусіць атрымаць вынік. Але які вынік можа быць, калі і пытання-то ў чалавека няма?

“Проста кажа: я маю права і хачу пагаварыць з міністрам. Бо гэта вельмі сімпатычны мне чалавек. І ведаеце што: як тут адмовіць, што сказаць? Як не абразіць чалавека? Наш міністр амаль ніколі не працуе да 18-й гадзіны — і ўсё. Гэта і 20, і 21, і 22. Трэба — 23, трэба — а першай ночы будзе на працы”, — распавядае ён.

З кожным, хто хоча запісацца на прыём да Паўла Латушкі, Алег Скарына размаўляе ад 5 да 20 хвілінаў.

Алег Скарына: “Што называецца, умова: каб трапілі да міністра тыя людзі, пытанні якіх не вырашаюцца на ўзроўні начальнікаў аддзелаў, намеснікаў міністра. А некаторыя думаюць, што калі міністр галоўны — дык ён дасць загад… А пытанне вырашаецца зусім проста!”

Звычайна Павел Латушка таксама прымае людзей у першую сераду месяца. Але 6 ліпеня ён будзе ў камандзіроўцы. Таму бліжэйшы прыёмны дзень Міністра культуры — 5 ліпеня.

Такім чынам, у наступным месяцы Еўрарадыё ўсё ж спадзяецца трапіць на прыём да двух міністраў. 7 ліпеня чакайце на цікавыя справаздачы!

Фота: "Працоўная слава".