Як будзе праходзіць дадатковая валютная сесія на біржы?

На сайце Беларускай валютна-фондавай біржы з’явілася новая версія рэгламенту таргоў. 14 верасня асноўная сесія валютнага рынка пачнецца, як заўжды, у 11:00. Па яе заканчэнні ўпершыню пройдзе дадатковая сесія, на якой банкі вызначаць рынкавы курс рубля.

“Яе прынцып такі ж, як і ў першай секцыі, — распавядаюць на БВФБ. — Да таргоў традыцыйна дапускаюцца толькі ўдзельнікі секцыі валютнага рынка. Сёння гэта 32 банкі, уключна з Нацбанкам. Усе астатнія могуць удзельнічаць у таргах, толькі калі стануць кліентамі ўдзельнікаў секцыі”.

Каб набыць валюту, беларускае прадпрыемства мусіць звязацца са “сваім” банкам і пакінуць яму заяўку. Так было і раней, калі на біржы праводзілася толькі адна сесія таргоў па валюце.

“Але зараз трэба яшчэ пазначаць максімальны курс, па якім ты гатовы гэтую валюту набыць, — кажа Еўрарадыё кіраўнік аднаго з буйных беларускіх прадпрыемстваў, які пажадаў захаваць ананімнасць. — Раней мы проста пісалі: нам патрэбная валюта. Таргі ішлі толькі па Нацбанку +/-2%. І вось, гэты эквівалент у рублях мы пералічвалі банкам”.

Справа ў тым, што да 15:00 у папярэдні дзень перад таргамі прадпрыемствы мусяць пералічыць “сваім” банкам рублі, за якія тыя будуць “атаварваць” іх заяўкі — спрабаваць набыць на біржы валюту. Раней было добра зразумела, колькі пералічаць, бо ў краіне быў адзін курс рубля. Зараз гэтае пытанне адкрытае.

“Зараз складана зразумець, па якім курсе мае сэнс адпраўляць заяўку. Мы, напрыклад, будзем чакаць і глядзець, што будзе”, — працягвае прадпрымальнік.

Каб з гарантыяй набыць долары, можна пазначыць у заяўцы высокі курс. Нагадаю, у пачатку верасня па выніках рэпетыцыі таргоў на дадатковай сесіі валютнага рынку склаўся курс у 9800 рублёў за долар. Але, натуральна, ніхто не хоча пераплачваць. З іншага боку, калі пазначыш у заяўцы занадта нізкі курс — рызыкуеш увогуле застацца без валюты.

“Калі ў заяўках на продаж няма прапановы, якая б адпавядала заяўцы на набыццё — заяўка застаецца незадаволенай. Яна можа застацца на біржы на наступны дзень, яшчэ на дзень…” — тлумачаць на біржы.

Паколькі пералічыць на рахунак Нацбанка грошы для “гульні” на біржы камерцыйныя банкі могуць толькі ў дзень напярэдадні таргоў, карэктаваць заяўкі сваіх кліентаў у залежнасці ад наяўнай прапановы ў іх не атрымаецца. Попыт будзе рэагаваць на прапанову са спазненнем у адзін дзень. Заяўку з занізкім курсам можна будзе зняць, а замест яе падаць новую.

Яшчэ адно пытанне заключаецца ў тым, ці будуць банкі спрабаваць набыць валюту танней. Маючы на сваім рахунку максімальную колькасць рублёў, якія іх кліенты гатовыя выдаткаваць на патрэбную ім суму ў доларах, яны могуць не рупіцца і адразу “паказваць” максімальную прапанову, тым самым “падкідаючы” курс.

“Ці будзе ўвогуле банк мець магчымасць аператыўнай сувязі з кліентам? Ці зможа ён своечасова сказаць: “Вы просіце валюту па такім курсе, а тут ёсць па іншым”? Ці зможа набыць меншую колькасць валюты па курсе большым, чым заявіў кліент?” — адказы на ўсе гэтыя пытанні дасць 14 верасня.

Фота: bymedia.net