Варыянтаў алімпійскіх шкарпэтак было два: чырвоны і белы

Самай заўважнай дэталлю новай формы беларускіх алімпійцаў неспадзявана сталі… чырвоныя шкарпэткі! Іх абмяркоўваюць паўсюль, прычым складана сказаць, што больш не падабаецца людзям: колер ці арнамент са сцяга на іх.

Ці не плануе Нацыянальны алімпійскі камітэт адмовіцца ад смелага аксэсуара? З гэтым пытаннем Еўрарадыё звярнулася да генеральнага сакратара НАК Георгія Катуліна.

“Я не займаюся дызайнам адзення, — адказаў нам сп. Катулін. — Гэтае пытанне лепш задаць аўтарцы калекцыі”.

“Першапачаткова варыянтаў шкарпэтак было два: чырвоны і белы. Зацвердзілі чамусьці чырвоны, — разам з Еўрарадыё здзіўляецца выбару НАК Вікторыя Колб, аўтар параднай формы беларускіх спартоўцаў на Алімпіядзе-2012 у Лондане. — А наконт арнаменту: хацелася не банальна ўзяць пэўны колер, а дадаць акцэнты, але акцэнты дробныя. Бо шкарпэткі бачна, у асноўным, толькі калі паднімаць і апускаць нагу”.

Алімпійская чэмпіёнка Пекіна па кіданні молата, адна з 66 беларускіх спартовак, якія ўжо маюць ліцэнзію на гульні ў Лондане, Аксана Мянькова прызнаецца: чырвоныя шкарпэткі з новай алімпійскай формы надзене наўрад ці.

“Ведаеце, я ўвогуле гетры не нашу. Я люблю вельмі-вельмі караценькія шкарпэткі, якія нават не закрываюць костачку. Так што наўрад ці!”.

Увогуле ж атлетцы алімпійская форма спадабалася.

“У прынцыпе, форма цікавая. Парадныя гарнітуры — нішто сабе такія. Ну, а пра тыя касцюмы, якія каб па вёсцы хадзіць, што сказаць… Таксама нішто сабе”.

“Апранаць” алімпійцаў Вікторыя Колб пачала восем месяцаў таму. Як даведалася Еўрарадыё, засталося давесці да ладу гальштукі і шыйныя хусткі. Усё астатняе НАК прыняў. Але, паводле словаў Вікторыі Колб, праз фінансавыя прычыны могуць адмовіцца ад аднаго з двух распрацаваных камплектаў.

“У краіне крызіс, а на ўсю экіпіроўку (парадная + паўсядзённая форма) трэба больш за 1 тысячу долараў. Вырашылі, што, можа, адну з двух пакінуць. Каб было не так накладна і ўвогуле…”

Натуральна, калі ў снежні 2010 года праца над формай пачыналася, жылі, як кажуць, у іншай краіне. Дзеля эканоміі алімпійскую форму пашылі з беларускай тканіны.

“Гэта тканіна Камвольнага камбіната. Ёсць да яе пытанні, — кажа Вікторыя Колб. — Тканіна “свеціцца”. Калі браць шво, падкладку штаноў — яна “свеціцца”. А ў звычайных жа штанах — не свеціцца! А тут, асабліва калі глядзець здалёк, “свеціцца”.

Гэта значыць, што тканіна крыху больш празрыстая, чым трэба. Тым часам мадэльер кажа, што добры выгляд формы здалёк быў адной з мэтаў, з якой яна сядала за працу.

“Хацелася стварыць дзелавы вобраз. І, разам з тым, не забывацца, што гэта Алімпіяда, каб былі элементы спорту, і гэта ўвасобілася ў абутку. Каб форма добра глядзелася здалёк і было добра відаць, што гэта беларусы. Калі браць агульны колер — гэта колер выпаленых каласоў, сена. Два астатнія — колеры беларускага сцяга”, — працягвае Вікторыя Колб

Тым часам Георгій Катулін паведаміў Еўрарадыё, што ніякіх новых рашэнняў наконт формы НАК пакуль не прымаў.