“Суды па крэдытах — ледзь не кожны дзень!”

“Мазда 3” 2007 года стаіць у гаражы ў Гарадку, што ў Віцебскай вобласці. Абвестку пра яе продаж на сайце “Банка ВТБ” папрасілі змясціць тыя ж людзі, якія ўзялі на яе крэдыт. Пакупніца на аўто знайшлася даволі хутка. Але, каб атрымаць ключы ад “Мазды”, яна збіраецца… Узяць крэдыт!

“Жанчына адна ўжо дала згоду, але зараз таксама бярэ крэдыт. Чакаем яе… — кажуць цяперашнія ўласнікі машыны, якія па-ранейшаму за яе разлічваюцца. —Каб толькі яна нас не падвяла, бо папрасіла пачакаць тыдзень-другі, пакуль разбярэцца са сваім крэдытам. Ведаеце, не так проста гэта ўсё”.

Валютны крызіс б’е нават тыя банкі, якія ўжо два гады не звязваюцца з крэдытамі ў валюце.

“Крэдыты ў валюце мы не выдаем з 2009 года, — кажа супрацоўніца “МТБанка”. — Але тыя, хто атрымаў яшчэ ў 2007-2008… Праблемы з гэтымі крэдытамі ўвесь час, а суды — ледзь не кожны дзень. У асноўным, валютныя ў нас аўтакрэдыты. Таму даводзіцца праз камісійныя крамы прадаваць машыны”.

Продажам аўтамабіляў заклапочаныя не толькі ў “МТБанку”. Два легкавікі (сярод іх прыгажун — “Крайслер Пацыфіка” 2004 года за 18 тысяч долараў) сумуюць на паркоўцы ля “Банка ВТБ”.

У “Белгазпрамбанку” кажуць, што за апошнія месяцы яго крэдытны партфель істотна не пагоршыўся. Можа, таму, што прывязваць крэдыты да стаўкі рэфінансавання, якая імкліва расце, там пачалі толькі з Новага года.

“Далёка не ўсе крэдыты, якія мы выдалі яшчэ раней, завязваліся на стаўку рэфінансавання. Адпаведна, памер працэнтнай стаўкі па іх застаўся на ранейшым узроўні, і па плацяжах мы асаблівых праблем не адчулі. Іншае пытанне — мы іх адчуваем на ўзроўні прыбытковасці. Бо зразумела, што рэсурсы падаражэлі. Але мы пакуль што не ўзнімалі стаўкі па крэдытах, выдадзеных раней”, — гавораць Еўрарадыё ва Упраўленні рознічнага крэдытавання “Белгазпрамбанка”.

У банке дадалі, што чакаюць горшага:

“Пакуль што гэта толькі першыя ластаўкі. Колькасць праблемных крэдытаў будзе расці, і асабліва ў валюце”.

Праблемы, якія ўзнікаюць у кліентаў, прымушаюць банкі кідаць ім “ратавальныя кругі” — праграмы па “рэструктурызацыі” і “рэфінансаванні” крэдытаў. На сайце банка “Мінск-Масква” напісана, што ён ужо два месяцы не выдае новых крэдытаў. А 6 чэрвеня тут запусцілі праграму “Рэструктурызацыя крэдыта”. Яна дазваляе зменшыць памер штомесячных выплат, але расцягвае крэдыт у часе:

“Па крэдытам, аформленым у валюце, павялічваецца тэрмін крэдытавання на 3 гады, у беларускіх рублях — на два. Адпаведна, выплаты за кожны месяц памяншаюцца”, — распавялі Еўрарадыё ў банку “Масква-Мінск”.

“БелРосБанк” знайшоў іншы спосаб дапамагчы кліентам з праблемнымі крэдытамі. На пагашэнне пазыкі ў валюце банк адкрываў новы крэдыт, які кліент вяртаў ужо ў беларускіх рублях. Але…

“На жаль, па праграме часова прыпынены прыём дакументаў на рэфінансаванне валютных крэдытаў”.