Сёння ўрачыста адкрыюць пазачарговую адукацыйную праграму імя Каліноўскага
Польскі ўрад зацвердзіў на гэты год 150 стыпендыяў для беларускіх студэнтаў.
Урачыстае адкрыццё пазачарговай адукацыйнай праграмы імя Кастуся Каліноўскага адбудзецца 21 сакавіка. Такая неабходнасць з'явілася ў сувязі са шматлікімі фактамі адлічэнняў студэнтаў з беларускіх ВНУ пасля падзеяў 19 снежня. Польскі ўрад абвясціў аб пачатку набору студэнтаў на праграму для рэпрэсаванай моладзі імя Каліноўскага яшчэ ў студзені, і неўзабаве для вызначаных асобаў пачнуцца падрыхтоўчыя курсы польскай мовы.
Згодна са звесткамі Камітэту абароны рэпрэсаваных "Салідарнасць", урад Польшчы зацвердзіў на гэты год 150 стыпендыяў для студэнтаў, 50 стыпендыяў для дактарантаў і 10 навуковых стыпендыяў для выкладчыкаў.
Старшыня камітэту Іна Кулей кажа, што праграма прадугледжвае атрыманне вышэйшай адукацыі і вучобы ў аспірантуры для людзей, якія зазналі арышты, затрыманні, адлічэнні з сярэдне-спэцыяльных і вышэйшых навучальных установаў; у каго былі ператрусы альбо штрафы, а таксама дзецям рэпрэсаваных палітыкаў, сябрам грамадскіх арганізацыяў і кампаніяў, якія цярпелі пераслед з боку ўлады, паведамляе Радыё Свабода.
