Рублёвы дэпазіт сёння ў 5 разоў больш прыбытковы, чым валютны

Найбольш відавочным спосабам захаваць пакупніцкую здольнасць сваіх грошай, калі інфляцыя ў краіне складае каля 80%, — гэта, натуральна, набыць што-небудзь. Але незалежны аналітык Сяргей Чалы кажа, што відавочнае — не заўжды самае выгаднае. Асабліва тады, калі таварамі доўгатэрміновага карыстання беларусы ўжо закупіліся ў траўні.
“Звычайна ў моманты, калі дэвальвацыя заканчваецца, вельмі выгадным робіцца пераход на нядоўгі перыяд у нацыянальную валюту. Бо самае галоўнае, што дзяржава мусіць рабіць у гэтыя моманты, — гэта спрабаваць вярнуць давер да яе”, — кажа ён.

Даволі верагодна, што з усталяваннем на біржы адзінай валютнай сесіі, на грашовым рынку ўсталюецца больш-менш зацішлівы час. Ужо зараз беларускія банкі прапануюць зрабіць рублёвыя ўклады пад 43-45% гадавых, і ёсць верагоднасць, што яшчэ да канца года адсоткі ўзрастуць разам са стаўкай рэфінансавання. Валюту можна прынесці ў банк пад 9-10%.

Еўрарадыё вырашыла разабрацца, у якіх грошах зараз найбольш выгадна рабіць уклад у банк. Каб знайсці самую выгадную камбінацыю, мы ўзброіліся віртуальнымі 5 мільёнамі рублёў і накіравалася ў бліжэйшае аддзяленне “Беларусбанка”.

Спярша “кладзем” у банк 5 мільёнаў рублямі. “Беларусбанк” прыме гэтыя грошы пад 43% гадавых. Кансультант падлічвае, колькі мы будзем атрымліваць кожны месяц:
“5 мільёнаў дзелім на 365 [колькасць дзён у годзе], памнажаем на 30 [колькасць дзён у месяцы], памнажаем на 43 [працэнтная стаўка па ўнёску], і дзелім на 100. Атрымліваем 176… амаль 177 тысяч”.
За год жа прыбытак (калі забіраць адсоткі кожны месяц) складзе 2 мільёны 150 тысяч рублёў.

Цяпер пераводзім 5 мільёнаў рублёў у долары і “укладаем” у той жа “Беларусбанк”. Але ўжо не пад 43%, а пад валютныя 9% гадавых.
“У вас атрымаецца амаль 600 долараў. Дакладней, 598. За месяц вы атрымаеце 4 долары 43 цэнты [каб разлічыць гэта самастойна, трэба паўтарыць папярэднія разлікі. Толькі замест 43 памножыць на 9. — Заўв. Еўрарадыё]. Відавочна, што ў беларускіх рублях атрымліваецца больш, чым 4 долары”.
За год, здымаючы адсоткі кожны месяц, заробім 53 долары 82 цэнты. 19 кастрычніка — гэта 446 тысяч 700 рублёў. Амаль у 5 разоў менш, чым разлічаны вышэй прыбытак у рублях.

Цяпер пачынаем шукаць падводныя камяні.

Першае, што прыходзіць у галаву, — чарговы абвал беларускага рубля. У такім выпадку 598 долараў падаражэюць. Але па падліках Еўрарадыё, каб яны прынеслі той жа прыбытак, што рублёвы банкаўскі ўклад, долар мусіць за год падаражэць да 10 тысяч 980 рублёў.

Наступны нюанс: чалавек, які кладзе грошы ў банк, страчвае магчымасць імі свабодна распараджацца. Але, па словах суразмоўцы Еўрарадыё, ад таго, у якой валюце зроблены ўклад, гэта не залежыць:
“Умовы аднолькавыя. Першыя тры месяцы здымаць можна толькі штомесяцовыя адсоткі. А пасля можна забіраць любую суму, а працэнтная стаўка не парушаецца”.

 
Таксама мы баімся інфляцыі. Грошы, пакуль ляжаць у банку, губляюць пакупніцкую здольнасць. Прагноз па інфляцыі на 2012 год — 12,5%. І на 2011 год былі прагнозы таго ж парадку. Але ўжо ў верасні нават у Мінэканомікі прызналі: гадавая інфляцыя складзе не менш за 100 адсоткаў.

Што праўда, у плане прыбыткаў з банкаўскіх укладаў, інфляцыю можна вынесці за дужкі:
“Ці вы 37 тысяч патраціце за месяц, здымаючы адсоткі ў доларах. Ці вы патраціце 177 тысяч, здымаючы адсоткі ў рублях. Інфляцыя аднолькавая”.
Такім чынам, зрабіць банкаўскі ўклад у беларускіх рублях сёння ўжо не выглядае такім вар’яцтвам, як, скажам, улетку. Але трэба прыгадаць, што тыя, хто паклаў грошы ў банк, напрыклад, на пачатку 2011 года, згубілі вельмі істотна.