Прад’яўлена абвінавачванне Статкевічу і Усу
Экс-кандыдатам у прэзідэнты Беларусі Дзмітрыю Усу і Мікалаю Статкевічу сёння прад'яўлена абвінавачанне ў "арганізацыі масавых беспарадкаў".
Пра гэта паведаміў часова выконваючы абавязкі начальніка ўпраўлення інфармацыі і грамадскіх сувязяў МУС Беларусі Канстанцін Шалькевіч. Дзмітрый Ус на працы сёння не з’явіўся, ягоны тэлефон не адказвае.
На думку следства, "пад час расследавання крымінальнай справы былі атрыманы неабвержныя доказы, у тым ліку паказанні сведак і іншых абвінавачаных, фота і відэаматэрыялы, якія сведчаць аб удзеле фігурантаў ў арганізацыі масавых беспарадкаў 19 снежня 2010 года", паведамляе Радыё Свабода.
Стала таксама вядома, што яшчэ аднаму фігуранту справы аб масавых беспарадках Аляксандру Класкоўскаму прад'яўленае абвінавачванне не толькі ў арганізацыі і ўдзеле ў масавых беспарадках, але і ў абразе прадстаўніка ўлады і ў самавольным прысваенні звання ці ўлады службовай асобы, паведамляе праваабарончы цэнтр "Вясна".
фота: spring96.org
