Пісьменнік, які 14 гадоў “адказваў” за увесь Нацбанк
За апошні год былы прэс-сакратар Нацбанка Анатоль Драздоў выдаў 4 кніжкі. Неўзабаве ў маскоўскім выдавецтве “Эксма” выйдзе яшчэ адна.
На мінулым тыдні Нацыянальны банк памяняў прэс-сакратара. На месца Анатоля Драздова прыйшоў Аляксандр Цімашэнка, які раней працаваў з прэм’ер-міністрам Беларусі. Каб наладзіць кантакт з новым прэс-сакратаром, я набраў добра вядомы нумар Упраўлення інфармацыі Нацбанка. Слухаўку падняў… Анатоль Драздоў!
Пакуль што Анатоль Фёдаравіч працуе ў тым жа кабінеце, што і заўжды. І кідаць Нацбанк не збіраецца:
Анатоль Драздоў: “Ні за што!”
Але пытанне пра тое, на якую пасаду яго перавялі, былы начальнік Упраўлення інфармацыі далікатна абышоў.
Анатоль Драздоў: “Тут пакуль удакладняецца… Канкрэтныя службовыя абавязкі пакуль не прапісаныя. Проста іншая праца, і ўсё!”
Цяпер за Нацбанк “адказвае” Аляксандр Цімашэнка. Ці піша ён кнігі — невядома, але Анатолю Драздову выкананне службовых абавязкаў ніколі не перашкаджала займацца літаратурай:
“У 2010/11 годзе ў мяне ў выдавецтве “Эксма” выйшла 4 кнігі, — здзіўляе Анатоль Драздоў. — Гэта не азначае, што я за гэты перыяд іх напісаў. Яны былі напісаныя раней. А пасля публікацыі першага рамана — у чэрвені 2010 года выйшаў (дарэчы, ён быў перавыдадзены ўжо праз 1,5 месяца пасля выхаду першага накладу) пачалі публікавацца і іншыя кнігі”.
Драздоў скарыў “Эксма” раманам “Інтэндант трэцяга ранга”, які быў апублікаваны ў чэрвені 2010 года.
Анатоль Драздоў: “Дагэтуль ён быў вядомы ў сеціве. У снежні 2008 года я выклаў яго ў адкрыты доступ. І з трох рэсурсаў, статыстыку па якіх я маю, яго спампавалі больш за 60 тысяч разоў. З іх амаль 33 тысячы на маёй старонцы, і 17 тысяч на “Лібрусеке”.
Наступнай кнігай стаў “Інтэндантурат”. Абедзве кнігі прысвечаныя прыгодам адстаўнога ваеннага Віктара Крайнева падчас Другой сусветнай вайны.
Анатоль Драздоў: “Гэтая дылогія — яна так і называецца “Інтэндант” — стала знакавай з’явай у жанры альтэрнатыўнай гісторыі. Фантастыка мае шмат напрамкаў. Ёсць навуковая фантастыка, а ёсць напрамак альтэрнатыўнай гісторыі, у якім працую я. Кнігі мае трапляюць і ў Беларусь, гэта я ведаю дакладна. Ёсць яны ва Украіне, у ЗША, у Канадзе, у Ізраілі… Там, дзе ёсць рускамоўная дыяспара”.
Пасля былі апублікаваныя яшчэ два раманы: “Кандацьер Багданаў” і “Спадар ваенлёт” — так звярталіся да пілотаў у 1910-я.
Анатоль Драздоў: “Кніга гэтая таксама ў жанры альтэрнатыўнай гісторыі. Але складнік рэальнай гісторыі вельмі вялікі. Гэта Першая сусветная вайна, грамадзянская вайна. І недзе на 2/3 аб’ёма кнігі дзея адбываецца на тэрыторыі сучаснай Беларусі”.
Але найперш раман “зачапіў” расійскіх чытачоў, якія знайшлі ў ім алюзію на “Справу Ульмана”.
Анатоль Драздоў: “Кніга мела нечаканы для мяне рэзананс. Там быў выкарыстаны адзін момант з рэальнай гісторыі Расіі. Высветлілася, што гэта вельмі вострая тэма, якая хвалюе шмат каго з расіян. Гаворка пра “Справу Ульмана”. Група Ульмана, афіцэра спецназа, на адным з блокпастоў абстраляла аўтамабіль, які спрабаваў прарвацца скрозь яго. Але ў машыне былі мірныя людзі. Ульман паведаміў пра гэта начальству. І раптам атрымаў загад усіх расстраляць”.
“Справа Ульмана” атрымала шырокі розгалас. У выніку суд прызнаў яго вінаватым у забойстве мірных жыхароў, што вельмі не спадабалася расіянам.
Анатоль Драздоў: “А я выкарыстаў гэты эпізод. Без прозвішчаў і па-іншаму, але шмат хто пазнаў яго. І мне дзякавалі за тое, што нагадаў пра гэтую гісторыю. На гэты нерв я трапіў выпадкова, не думаў пра гэта”.
У жніўні 2011 года Анатоль Драздоў скончыў свой чарговы раман. Рукапіс быў адразу накіраваны ў “Эксма”, і выдавецтва прыняло яго да публікацыі. Анатоль Драздоў спадзяецца, што будзе трымаць кнігу ў руках праз 2-3 месяцы.
