На матч Беларусь — Балгарыя прадалі квіткоў на паўтара сектары
Яшчэ 1,5 - 2 тысячы ў Федэрацыі футбола спадзяюцца рэалізаваць за апошні дзень продажу.
На таварыскі матч Беларусь — Балгарыя, які адбудзецца 10 жніўня ў 20:00 на мінскім стадыёне “Дынама”, прададзена каля 2 тысяч квіткоў. Гэта прыкладна 6% ад умяшчальнасці стадыёна "Дынама".
У Беларускай федэрацыі футбола Еўрарадыё паведамілі, што найбольш актыўна квіткі на гульні зборнай раскупляюцца ў апошнія дні перад матчам. Таму ёсць спадзеў, што яшчэ 1,5–2 тысячы квіткоў аматары футболу набудуць 10 жніўня.
Таксама ў БФФ паведамілі, што права наведаць матч бясплатна атрымалі ўдзельнікі фан-клуба мінскага “Дынама”. Для іх вызваленыя два сектары стадыёна. На такі эксперымент Федэрацыя футбола ідзе ўпершыню.
Нагадаем, квіткі на матч Беларусь — Балгарыя каштуюць ад 5 да 25 тысяч рублёў.
