МВФ парэкамендаваў Нацбанку падвысіць стаўку рэфінансавання да 100%

17 кастрычніка кіраўнік місіі Міжнароднага валютнага фонда ў Беларусі Крыс Джарвіс даў справаздачу па выніках двух тыдняў працы ў нашай краіне. Ён адзначыў, што “ўражаны і дзеяннямі, і абавязальніцтвамі, якія ўскладаюць на сябе ўрад і Нацбанк”, але ўказаў на шэраг дадатковых крокаў, якія “трэба рэалізаваць неадкладна”.
У прыватнасці, Нацбанк мусіць прыняць захады “каб насельніцтва было ўпэўненае, што ашчаджэнні прынясуць станоўчыя прыбыткі”:
“Мы рэкамендуем ураду да канца 2011 года працягваць прадпрымаць усе магчымыя захады для стрымлівання выдаткаў і замарожвання крэдытавання ў межах дзяржаўных праграмаў, якое прывяло да празмернага росту крэдытаў і інфляцыі, — сказаў Крыс Джарвіс. — А Нацыянальнаму банку варта далей і як мага хутчэй падвышаць працэнтныя стаўкі да ўзроўня, які перавышае інфляцыйныя чаканні”.
Нагадаем, згодна з прагнозам Міністэрства эканомікі, інфляцыя ў 2011 годзе складзе каля 100%.
17 кастрычніка місія МВФ на чале з Крысам Джарвісам пакідае Беларусь. Падрабязней пра тое, што на гэта раз парэкамендаваў нашай краіне Міжнародны валютны фонд, чытайце неўзабаве на сайце Еўрарадыё і слухайце ў нашым эфіры.