“Можа, габелен Пятру Пятровічу хто-небудзь ад горада падарыў”

Днямі Нацбанк Беларусі праз сайт Мінгарвыканкама абвясціў пра распродаж рэчаў. Па добрых коштах на продаж выстаўленыя некалькі сейфаў, валізы, кейсы, папера, кубкі і нават цукарніца. “Нацбанк распрадае рэчы ў сувязі з ліквідацыяй!” — жартуюць інтэрнэт-юзеры.

Еўрарадыё асабліва зацікавілася габеленам “Пінск” за 37 мільёнаў рублёў. Цікава, дзе ён знаходзіўся дагэтуль і чаму Нацбанк вырашыў з ім развітацца.

 “Усё, што магу сказаць вам: габелен быў у карыстанні, — распавядае нам не вельмі гаваркі супрацоўнік Нацбанка. — А што датычыцца інфармацыі, дзе што вісела, звяртайцеся ў прэс-службу”.

Нда, Нацбанк. З такімі гандлярамі ты габелен не прадасі.

 Аляксандр Цімашэнка працуе на пасадзе прэс-сакратара Нацбанка трэці месяц. Пра тое, дзе раней вісеў габелен “Пінск”, не ведае: “Можа, Пятру Пятровічу хто-небудзь ад горада падарыў”.

Не памятаюць пра таямнічы габелен ні ў пінскім аддзяленні Нацбанка, ні ў гарвыканкаме, ні ў Палескім універсітэце. Сляды габелена губляюцца ў гушчы гадоў.

Але, раз пайшла такая справа, мы вырашылі даведацца, якія яшчэ цікавыя рэчы прадаюць беларускія банкі. Улоў не прымусіў сябе чакаць.

Напрыклад, на сайце "БПС-Банка" прадаецца цэлая вытворчая лінія: тут і пагрузчыкі, і экскаватар, і машына для сартыроўкі камянёў, і конусная драбілка! Хіба што ротарнай жаткі з абмалотам не хапае.

“Усё проста, як сякера: гэта маёмасць лізінгавая. Атрымальнік лізінга разлічыцца не змог, і мы тэхніку канфіскавалі. Дарэчы, вось толькі што распавядаў пра яе патэнцыйнаму пакупніку. І за сёння гэта пятае тэлефанаванне. Сам здзіўляюся! Падазраю, што ўсё звязана з выхадам на адзіны курс, бо кошты-то ў рублях, і ўсё зафіксавана. Таму зараз гэта стала асабліва цікава”, — распавядаюць Еўрарадыё ў "БПС-Банку".

Яшчэ адзін экспанат з “калекцыі” "БПС-Банка": стаматалагічная ўсталёўка!

“У нас пры банку было такое прадпрыемства — медыцынскі цэнтр “Кіпарыс”. Самастойнае, але мы былі заснавальнікамі, а для супрацоўнікаў банка была невялікая зніжка. Пасля яны распаліся, і гэтая маёмасць адышла банку”.

Крызіс не шкадуе не толькі медыцынскія цэнтры, але і… аграгарадкі! На сайце “Белаграпрамбанка” прадаецца 8 трактароў з ГП “АграСітцы”. Тэлефануем туды:

“Так, гэта ў нас пазыкі! Крэдытныя дамовы не забяспечваем, таму і справы ў нас дрэнныя. А выпускаем мы пладовае віно. Але акцызныя маркі цяпер… Вельмі нявыгадна. Мы працуем, і тэхніка гэтая толькі ў заклад перададзеная ў банк. Але мы дагэтуль ёю карыстаемся”.

А ў “Белаграпрамбанку” кажуць, што і радыя б прадаць трактары, і пакупнікі на іх ужо ёсць — але за тэхніку з аграгарадка трымаюцца мясцовыя ўлады!

“Гэтую маёмасць набыць праблемна, бо мясцовыя ўлады ставяць палкі ў колы. Людзі тэлефануюць, але пакуль гэта ў падвешаным стане”.

Апошнімі днямі ў банку таксама назіраюць шалёны попыт на тэхніку, канфіскаваную за пазыкі.

“Там, у асноўным, у нас кошты вельмі заніжаныя ў параўнанні з тым, як курс рубля то падае, то расце. А ў нас кошты на час закладу. Калі пералічваць, дык па старым курсе… Я так разумею, па 3,0 [тысячы рублёў за долар] было закладзенае”.

 У “Белаграпрамбанку” кажуць, што ваганні курсаў паспрыялі таму, што даўжнікоў у банка стала… менш.

“Прадпрыемствам жа не выгадна самім прадаваць па такіх коштах! Таму яны імкнуцца самі, як мага хутчэй, кампенсаваць свае пазыкі”.

На сайце “Парытэтбанка” Еўрарадыё знайшло ў спісе маёмасці на продаж… інкасатарскі аўтамабіль! Вось бы па горадзе паганяць на такім!

“Аўтамабіль стары, 1994 года. Вядома, вялікія выдаткі на рамонт, — папярэджваюць Еўрарадыё ў банку. — Таму бярэм новы. У прынцыпе, бяруць іх, ставяць звычайныя дзверы, і ўсё! А гэты вось мы літаральна днямі на сайт павесілі — і ўжо сёння забіраюць!”

Тым часам…

Нацыянальны банк апублікаваў статыстыку па так званых праблемных крэдытах. З пачатку года крэдытны партфель беларускіх банкаў істотна пагоршыўся. На 1 студзеня колькасць “праблемных” крэдытаў была 100,6 мільярдаў рублёў. 1 кастрычніка гэта ўжо іншая лічба: 208,4 мільярдаў рублёў. Прычым толькі за верасень колькасць “праблемных” крэдытаў узрасла на чвэрць.

Пры пачатку года беларусы спраўна скарачалі колькасць “праблемных” крэдытаў. Напрыклад, на 1 траўня банкі мелі праблемы са спагнаннем 91,8 млрд рублёў пазыкаў. Але ўжо 1 чэрвеня, пасля дэвальвацыі, колькасць “праблемных” крэдытаў падскочыла да 120,6 млрд.

З 1 чэрвеня колькасць “праблемных” крэдытаў атрымалася нязначна скараціць толькі ў жніўні. А найбольш “праблемная” пазыка беларусаў перад банкамі ўзрасла ў верасні: з 145,2 пры пачатку месяца да 208,4 на 1 кастрычніка.

Амаль палову “праблемных” крэдытаў (87 млрд) не аддаюць жыхары Мінска.