Мінкульт: На вынікі “Еўрафэста” ніхто з удзельнікаў не скардзіўся
Пра гэта Еўрарадыё паведаміў першы намеснік міністра культуры Уладзімір Карачэўскі.
Уладзімір Карачэўскі: “У нас не было. Гэта ж тыдзень ужо прайшоў, але ніхто не звяртаўся — афіцыйнага звароту не было”.
Нагадаю, пераможцай конкурсу “Еўрафэст”, фінал якога праходзіў 14 лютага ў Палацы спорту, журы абвясціла Алёну Ланскую. Але 16 лютага партал tut.by паведаміў: Аляксандр Лукашэнка стварыў камісію для праверкі вынікаў галасавання ў фінале "Еўрафэста". Такое рашэнне было прынятае з-за скандалу падчас абвяшчэння вынікаў у Палацы спорту і пазней у "байнэце": маўляў, рэальныя вынікі галасавання не адпавядаюць абвешчаным.
Хто ўваходзіць у гэтую камісію і ці існуе яна ўвогуле, пакуль дакладна не вядома. Хоць некаторых сябраў журы ўжо апыталі невядомыя асобы. Уладзімір Карачэўскі ў адказ на пытанне Еўрарадыё заявіў, што сам ён у гэтую камісію не ўваходзіць. І ўхіліўся ад адказу на пытанне, ці ёсць у гэтай камісіі нехта з супрацоўнікаў Мінкульта.
