Мінчанін 5 гадоў судзіцца з вядомым прафесарам з-за аперацыі

Як расказаў Еўрарадыё Міхаіл Жук, ён доўгі час пакутаваў з-за праблем з носам: не адчуваў пахаў, часам без прычын ішла кроў, цяжка было дыхаць. Нарэшце звярнуўся у сваю 19-ю паліклініку па дапамогу і атрымаў накіраванне да спецыялістаў у 9-ы клінічны шпіталь. Адтуль яго накіравалі на кансультацыю да прафесара Чудакова.

Міхаіл Жук: “Гэты спецыяліст адмовіўся мяне кансультаваць у 9-м шпіталі і сказаў, што калі я хачу, каб мяне пракансультавалі, трэба звярнуцца ў медыцынскі цэнтр. Звярнуўся туды, ён мяне агледзеў. Пагадзіўся з дыягназам доктара з паліклінікі — што ў мяне скрыўленне насавой перагародкі, што мне патрабуецца аперацыя. І сказаў, што можа правесці гэтую аперацыю, напісаў сваё заключэнне і сказаў, што ў яго ёсць свой цэнтр. Маўляў, туды звяртайцеся, ён там аперыруе за грошы”.



Але доктар з паліклінікі даў накіраванне спадару Жуку ў той жа 9-ы шпіталь для бясплатнай аперацыі — куды хворы і накіраваўся. І там жа пачаліся яго “прыгоды”. Спачатку, кажа, яго паклалі не ў лор-аддзяленне, а ў аддзяленне сківічна-тварнай хірургіі. І там ізноў ён патрапіў да прафесара Чудакова. Як высветлілася пазней, доктар у гэтым шпіталі афіцыйна не працаваў: быў у якасці кансультанта. Але аперацыю чамусьці даверылі весці яму.

У выніку аперацыю яму зрабіў прафесар Чудакоў 28 снежня 2005 года. Але ўжо на наступны дзень спадар Жук адчуў сябе дрэнна: не мог ні дыхаць, ні піць, ні есці. Але дапамогі яму ніхто не аказваў. І толькі пасля навагодніх святаў прафесар яго наведаў наноў.

Міхаіл Жук: “Пасадзілі мяне ў крэсла і пачалі даставаць у мяне з носа тампоны, якія апынуліся па 40 сантыметраў даўжынёй. І толькі тады мне стала нармальна дыхаць”.

Жук выпісаўся са шпіталя. Вось толькі нос яго не прыйшоў у норму, а стаў апухаць. На звароты па дапамогу Чудакоў абмяжоўваўся нейкімі ўколамі. Іншыя дактары казалі, што ў носе нешта, відаць, засталося пасля аперацыі, але ў дапамозе адмаўлялі і накіроўвалі да таго, хто рабіў аперацыю.



Міхаіл Жук звяртаўся і ў Міністэрства аховы здароўя, але дапамогі, кажа, не атрымаў. У выніку вымушаны быў зрабіць аперацыю ў Расіі. Каштавала яна 5 тысяч долараў.

Міхаіл Жук: “Сабраў грошы і паехаў. Мне зрабілі аперацыю ў Санкт-Пецярбургу. І падчас аперацыі дасталі іншароднае цела: марля там ляжала. Уяўляеце — на пераноссі ў мяне ляжала марля! Прыбралі гэтую марлю, вычысцілі ўсё ад гною. І кажуць: “Ён жа вам тут усе косткі пераламаў! Што ён тут вам рабіў?!”

Па прыездзе Жук звярнуўся ў пракуратуру з патрабаваннем распачаць супраць Чудакова крымінальную справу за нанясенне шкоды і кампенсаваць фінансавыя і маральныя выдаткі. Але справу распачынаць адмаўляліся, матывуючы тым, што судмедэкспертыза не знайшла ў яго прыкметаў цяжкіх цялесных пашкоджанняў.

Такіх экспертыз было, паводле словаў Жука, шэсць. І ўсе давалі аднолькавы вынік. Праўда, і праводзіліся ў адным і тым жа месцы — у Дзяржаўнай службе судмедэкспертызы пад кіраўніцтвам Гусакова. Да суда справа дайшла толькі ў 2009 годзе — з грамадзянскім іскам пацярпелы звярнуўся сам у суд Маскоўскага раёна.

Падчас суда высветлілася, што аперацыю Жуку прафесар рабіў не паводле медыцынскіх, а паводле эстэтычных паказчыкаў — выпраўляў яму форму носа, а не перагародку. Больш за тое, былы пацыент абвінавачвае доктара ў фальсіфікацыі дакументаў і падробках яго подпісу.









Суд абавязаў Чудакова выплаціць Жуку 3 мільёны рублёў маральнай кампенсацыі, але астатнія выдаткі вяртаць прафесару не прысудзіў. Перагляд справы згодна з рашэннем Мінскага гарадскога суда адбыўся ў судзе Першамайскага раёна. Але вынік той жа.





Жук не супакоіўся і дайшоў да Адміністрацыі прэзідэнта. Пасля гэтага супраць прафесара распачалі крымінальную справу.

Міхаіл Жук: “Сёлета распачалі-такі крымінальную справу. Даручылі следчаму ўпраўленню ГУУС Мінгарвыканкама, але ўсё тое ж: два месяцы адводзіцца на следства, а яго дагэтуль не правялі. Далі ўказанне правесці экспертызу за межамі Беларусі, у Расіі — яна дагэтуль не праведзеная. Экспертыза почырку не праведзена”.

Жук супакойвацца не збіраецца і мяркуе дамагацца праўды. Але і прафесар Чудакоў не думае прызнаваць сваёй віны. Наадварот, даказвае, што ўсё было зроблена правільна, а ўсе абвінавачванні яго былога пацыента — лухта.

Алег Чудакоў: “Гэта лухта. Экспертная камісія даказала адваротнае. Усё было зроблена на вышэйшым узроўні. Ён падаваў, каб супраць мяне была крымінальная справа, падаваў і ў суд, але гэта ўсё дарэмна”.

І расказаў, што супраць Жука паводле ініцыятывы з “самага верху” распачатая справа аб абароне гонару і рэпутацыі паважанага прафесара. Больш за тое, кіраўнік Рэспубліканскага спецыялізаванага цэнтра сківічна-тварнай і пластычнай хірургіі, кансультант Галоўнага ўпраўлення лекава-прафілактычных і санаторна-курортных устаноў Адміністрацыі прэзідэнта Алег Чудакоў “параіў” Еўрарадыё не лезці ў гэтую справу.

Алег Чудакоў: “Гэты працэс цяпер пад кантролем Генеральнай пракуратуры. Вы зразумелі, пра што размова? Каб потым разам з гэтым Жуком не патрапіць у непрыемную гісторыю”.

Падтрымала падабароннага і яго адвакат — загадчыца юрыдычнай кансультацыі Цэнтральнага раёна сталіцы Святлана Камяк.

Святлана Камяк: “Жуку была зробленая абсалютна правільная аперацыя. Усе экспертныя камісіі, якіх было 8, сказалі, што ніякіх парушэнняў тэхнічных альбо нейкіх іншых не было. Выснова адна: аперацыя была праведзена правільна. А рэакцыя арганізма можа быць індывідуальнай”.

А ў носе яго была не марля, а гемастатычная губка, якая проста не рассмакталася. І ў Расію, адзначае адвакат, Жук паехаў дарэмна.

Святлана Камяк: “Яму прапаноўвалі адразу, як у яго ўзнік запаленчы працэс, зрабіць рэвізію раны — і за тры секунды гэты запаленчы працэс быў бы прыбраны. А ён самастойна паехаў у Санкт-Пецярбург, куды яго ніхто не накіроўваў. І з чаго пачаў усю гэтую валтузню”.

І нам параіла ў справу не лезці.

Святлана Камяк: “Я думаю, што пакуль гэтую падзею вам не трэба ўвогуле асвятляць. Я вам рэкамендую. Прафесар — асоба вельмі вядомая ў Беларусі, і калі дзесьці нейкім чынам яго гонар і рэпутацыя будуць закранутыя, ён проста так не будзе пакідаць гэтыя моманты”.

Адвакат паабяцала, што калі справа нарэшце завершыцца, яна дапаможа падрыхтаваць сапраўды цікавы матэрыял. А ўсе словы Жука назвала не вартымі даверу.

Фота: Змітра Лукашука