Крэдыт на адукацыю ў “Беларусбанку” з пачатку года падаражэў амаль на 4%

22 чэрвеня Нацбанк у пяты раз ад пачатку 2011 года падвысіў стаўку рэфінансавання. Грошы, якімі ён забяспечвае іншыя банкі для крэдытавання насельніцтва, падаражэлі на 2% — да 18% гадавых.

Разам са стаўкай рэфінансавання растуць адсоткі, якія трэба сплочваць па прывязаных да яе крэдытах. А калі ўлічваць, што за апошнія 6 месяцаў стаўка рэфінансавання ўзрасла ўжо на 7,5%, гаворка ідзе пра вялікія грошы!

Добрая навіна для тых, хто пазычаў грошы ў камерцыйных банках. Там крэдыты прывязаныя да стаўкі рэфінансавання вельмі рэдка, і яе рост ніяк не ўплывае на колькасць грошай, якія трэба вярнуць.

“Ад падвышэння стаўкі рэфінансавання праблемных крэдытаў у нас не паболела, — кажа супрацоўніца ўпраўлення па працы з праблемнымі актывамі “МТБанка”. — Новыя крэдыты ў рублях мы выдаем пад большыя адсоткі, і ўсё”.

Іншы сітуацыя ў “Белгазпрамбанку”. Там Еўрарадыё паведамілі, што з Новага года “практычна ўсе крэдыты заключаюцца ў прывязцы да стаўкі рэфінансавання”. Але пакуль што яе рост не пагоршыў крэдытны партфель банка.

Банк “Масква-Мінск” з 20 красавіка ўвогуле перапыніў крэдытаванне фізічных асобаў. Цікава, што менавіта з 20 красавіка Нацбанк узняў стаўку рэфінансавання другі, але не апошні раз за 2011 год. У “Белаграпрамбанку” Еўрарадыё паведамілі, што ў іх няма крэдытных праграм, працэнты па якіх прывязаныя да стаўкі рэфінансавання. Адпаведна, на долю праблемных крэдытаў яе падвышэнне не ўплывае.

Затое такія крэдыты ёсць у самым буйным банку краіны — “Беларусбанку”. Напрыклад, 25% ад стаўкі рэфінансавання складае адсотак па крэдыце маладому спецыялісту. Завязаны на стаўку рэфінансавання і ільготны крэдыт на адукацыю: адсотак па ім складае палову стаўкі рэфінансавання. Выплаты па гэтых крэдытах з пачатку года ўзраслі, адпаведна, на 1,875% і 3,75%...

Усе астатнія крэдыты ў “Беларусбанку” ад стаўкі рэфінансавання не залежаць:

“Стаўкі па іх не фіксаваныя. Яны прымаюцца праўленнем банка і не звязаныя са стаўкай рэфінансавання. Такога, каб яна памянялася і ў вас тут жа аўтаматычна змяніліся стаўкі па крэдытах, няма”, — патлумачылі Еўрарадыё ў адным з аддзяленняў “Беларусбанка”.

У “Беларусбанку” дагэтуль можна знайсці крэдыты па адсотках, ніжэйшых за стаўку рэфінансавання — але не звязаных з ёй. Гэтыя крэдыты — стратныя для таго, хто іх выдае. “А як жа сацыяльная адказнасць банка? — здзіўляюцца ў адказ на маё пытанне ў прэс-службе “Беларусбанка”. — Па шматдзетных сем’ях у нас прынятая стабільная і нязменная стаўка ў 14%, не прывязаная да стаўкі рэфінансавання”.

Але пэўныя рэчы і сацыяльнай адказнасцю не патлумачыш. Напрыклад, пад 16% (менавіта такой да 22 чэрвеня застаецца стаўка рэфінансавання) у “Беларусбанку” можна атрымаць безнаяўны крэдыт “Агратурыст” для аплаты адпачынку ў вясковых сядзібах. Што праўда, у банку Еўрарадыё сказалі, што, нягледзячы на нізкую працэнтную стаўку, гэты крэдыт папулярнасцю не карыстаецца.

Фота: ustravel.org