Кэтрын Эштан запатрабавала вызваліць беларускіх палітвязняў
Вярхоўны прадстаўнік Еўрасаюзу па знешняй палітыцы і палітыцы бяспекі Кэтрын Эштан заявіла, што глыбока засмучаная новымі прысудамі экс-кандыдатам у прэзідэнты.
Гаворка ідзе пра Міколу Статкевіча і Дзмітрыя Уса.
У заяве Эштан, перадае Радыё "Свабода", гаворыцца, што гэтыя палітычна матываваныя прысуды сталі яшчэ адным крокам назад у тым, што тычыцца павагі ў Беларусі да правоў чалавека, вяршэнства закона і дэмакратычных прынцыпаў.
Прадстаўніца Еўрасаюзу заклікала спыніць рэпрэсіі супраць палітычнай апазіцыі, грамадзянскай супольнасці і незалежных СМІ. Яна запатрабавала неадкладнага вызвалення і рэабілітацыі палітвязняў.
Нагадаем, 25 траўня Міколу Статкевіча асудзілі на шэсць, а Дзмітрыя Уса на пяць з паловай гадоў калоніі ўзмоцненага рэжыму.
