Кары Хейкіля: Першае, над чым папрацую са зборнай, — абарона!

110817 Sviardlou_Khejkkelia.mp3

Сёння Федэрацыя хакея Беларусі пазнаёміла журналістаў з новым галоўным трэнерам нацыянальнай зборнай, фінам Кары Хейкіля. Спецыялісту 51 год. Да зборнай Беларусі ён працаваў са шведскімі і фінскімі клубамі, а ў 2004 годзе стаў першым фінскім трэнерам у Расіі. Яраслаўскі “Лакаматыў” прывёў да “срэбра” расійскага чэмпіянату (2008) і Кантынентальнай хакейнай лігі (2009), а сёлета ледзь не вывеў у фінал КХЛ магнітагорскі “Металург”. З 16 жніўня трэнер перабраўся ў Беларусь і падпісаў трохгадовы кантракт на працу з нацыянальнай камандай.

Такім чынам, Кары Хейкіля…

… атрымаў прапанову ўзначаліць зборную Беларусі 3 месяцы таму. “Па фінансах мы прапанавалі сп. Хейкіля еўрапейскія ўмовы (дакладная сума не называецца. — заўв. Еўрарадыё). Перамовы з ім не былі простымі. Але была ўзаемазацікаўленасць, — кажа старшыня ФХРБ Яўген Ворсін. — Мы паступова набліжалі пазіцыі. І вы ведаеце, якія былі да яго асноўныя кандыдаты на пасаду галоўнага трэнера і на чым мы апякліся. Тут такіх праблем не ўзнікла”.

…пасля заканчэння кантракту з магнітагорскім “Металургам” хацеў крыху адпачыць ад хакея. Але вельмі ўзрадаваўся прапанове ўзначаліць зборную Беларусі. З нацыянальнымі камандамі Кары Хейкіля дагэтуль не працаваў;

…узначаліць зборную Беларусі як мінімум да снежня 2012 года. Цягам першых 16 месяцаў кантракт сп. Хейкіля са зборнай не можа скасаваць ні трэнер, ні ФХРБ;

…будзе гатовы назваць касцяк нацыянальнай каманды не раней чым праз 2 месяцы. Але перамовы з хакеістамі збіраецца пачынаць у вельмі хуткім часе. Напрыклад, з Астапчуком з яраслаўскага “Лакаматыва” сп. Хейкіля хоча пабачыцца падчас візіту расійскай каманды ў Мінск на першы матч наступнага сезона Кантынентальнай хакейнай лігі.

…хоча прагледзець як мага больш маладых беларускіх хакеістаў і абяцае прывезці лепшых маладзёнаў ужо на “Кубак Палесся” у лістападзе 2011 года;

…не мае пэўнага слогана, з якім можна было б звярнуцца да каманды. “Я хачу, каб каманда стала сям’ёй праз працу, а не праз слоганы, — распавядае Кары Хейкіля. — А слоганы гэтаму не вельмі-то дапамагаюць”;

…першае, над чым папрацуе са зборнай Беларусі, — гульня ў абароне, бо “абараняцца — гэта самае важнае і самае лёгкае, чаму можна навучыць”;

…ужо сустракаўся з трэнерам мінскіх дынамаўцаў Марэкам Сікорам і, як фін са славакам, знайшоў з ім добрае паразуменне: “Дынама” па-ранейшаму застаецца нацыянальнай камандай — падмуркам для зборнай Беларусі;

…узяў другім трэнерам Аляксандра Андрыеўскага — асістэнта галоўнага трэнера мінскага “Дынама”

…рускай мовай валодае не вельмі ўпэўнена, але будзе працаваць са зборнай Беларусі без перакладчыка. Пра хакей распавядае журналістам па-руску, а пра сябе — па-англійску;

…навучыць беларусаў гуляць дысцыплінавана, “па схеме”, “каб кожны хакеіст ведаў, што ён мусіць рабіць на пляцоўцы”;

…ведае пра тое, што да хакея ў Беларусі асаблівае стаўленне, але не хоча на гэта зважаць: “Я буду рабіць сваю працу. Я не хачу думаць ні пра што, акрамя працы”.

…у Беларусь пераедзе з жонкай і 8-гадовай аўчаркай Мальмай. Дзеці — 28-гадовы сын і дачка, маладзейшая на 6 гадоў, — застануцца ў Фінляндыі;

…у свой час атрымаў ліцэнзію пілота, але даўно пратэрмінаваў яе;

…любіць катацца на лыжах, гуляць з сабакам. Цікавіцца ўсім, што звязана з маторамі: аўтамабілямі, матацыкламі, самалётамі.

На фота: Кары Хейкіля, Яўген Ворсін, Канстанцыя Лешчанка.

Фота Паўла Свярдлова.