Дзмітрый Бага: Гасцявы матч з “Міланам” я праваліў!
У заўтрашнім хатнім супрацьстаянні з “роса-нэры” паўабаронца БАТЭ абяцае выправіцца.
Паўабаронца БАТЭ Дзмітрый Бага лічыць, што 1 лістапада барысаўскі футбольны клуб мусіць згуляць супраць “Мілана” больш агрэсіўна, чым у папярэдняй сустрэчы. Нагадаем, 19 кастрычніка БАТЭ прайграў “роса-нэры” з лікам 2:0.
— Згодзен, гэты матч я праваліў, — кажа Дзмітрый Бага.
— Не праваліў, а мог згуляць лепш, — выпраўляе свайго падначаленага Віктар Ганчарэнка. І пагаджаецца: — Каб абыграць такога саперніка, мы мусім быць вельмі дзёрзкія!
Дзмітрый Бага спадзяецца, што перамагчы сяміразовага ўладальніка Кубка еўрапейскіх чэмпіёнаў барысаўскаму клубу дапамогуць трыбуны. Футбаліст кажа, што ў БАТЭ пасля матча з "Міланам" правялі вялікую “працу над памылкамі”:
— Мы разбіралі гэтую гульню. Я ведаю, дзе я не меў рацыі. Але тая гульня ў мінулым. Будзем імкнуцца выпраўляць памылкі, — кажа Бага.
Матч 4-га круга групавога этапа Лігі чэмпіёнаў БАТЭ — “Мілан” пачнецца 1 лістапада ў 20:00 на стадыёне “Дынама” ў Мінску.
