Расійскія войскі прыбудуць у Беларусь да сярэдзіны верасня 2025-га
Вучэнні чакаюцца ў пачатку восені / t.me/modmilby/
Стала вядома, калі плануецца правесці ў Беларусі сумесныя з РФ вайсковыя вучэнні "Захад-2025". Яны запланаваныя на сярэдзіну верасня 2025 года, паведаміў у чацвер начальнік Дэпартамента міжнароднага ваеннага супрацоўніцтва, памочнік міністра абароны па пытаннях міжнароднага ваеннага супрацоўніцтва Валерый Равенка. Паводле яго слоў, у вучэннях паўдзельнічаюць больш за 13 тысяч вайскоўцаў. Колькі прыбудзе расіян, Равенка не ўдакладніў.
Цяпер вырашаецца, назіральнікаў з якіх краін на вучэнні запросяць, а з якіх — не. Залежыць гэта будзе ў тым ліку і ад "далейшых крокаў, якія будуць прадпрымацца кіраўніцтвам гэтых дзяржаў і кіраўніцтвам абаронных ведамстваў".
Пра тое, што Беларусь і Расія запланавалі сумесныя вучэнні "Захад-2025", стала вядома ў кастрычніку 2024-га. Міністр абароны РБ Віктар Хрэнін падкрэсліў, што яго ўдзельнікі павінны "прадэманстраваць здольнасць і гатоўнасць выконваць сумесныя задачы на высокім узроўні". Мінулай восенню стала вядома, што на верасень 2025-га ў Беларусі запланаваныя сумесныя вучэнні Арганізацыі дамовы аб калектыўнай бяспецы. Меркавалася, што "Захад-2025" пройдзе раней за вучэнні АДКБ.
