Расійская ракета ў Кіеве трапіла ў пад'езд жылога дома

У ноч на 17 чэрвеня расійскія войскі нанеслі масіраваныя ўдары па Кіеве ўдарнымі дронамі, а таксама ракетамі розных тыпаў. Як паведамілі гарадскі галава Віталь Клічко і кіраўнік КМВА Цімур Ткачэнка, выбухі адбываліся ў розных раёнах украінскай сталіцы.

Дроны пачалі атакаваць Кіеў яшчэ позна ўвечары 16 чэрвеня, адзначае hromadske.ua. Тады фіксавалі выбухі ў Саломенскім, Дарніцкім і Святошынскім раёнах горада.

У Саломенскім раёне ад абстрэлаў акупантаў пашкоджаны два жылыя дамы. Па словах Ткачэнкі, там пацярпелі 18 чалавек, 6 з якіх шпіталізавалі.

У іншы шматкватэрны дом у тым жа раёне трапіла балістычная ракета. Яна цалкам разбурыла пад'езд.

Таксама вядома пра пашкоджанні інтэрната Нацыянальнага авіяцыйнага ўніверсітэта. А ў Шаўчэнкаўскім раёне ў выніку абстрэлу пачаўся пажар на верхніх паверхах жылога дома.

Паводле папярэдніх звестак, у Кіеве ў выніку расійскай атакі загінулі 14 чалавек, каля 60 атрымалі раненні.

Паводле інфармацыі Цімура Ткачэнкі, у ноч на аўторак расіяне абстралялі Кіеў 175 дронамі, больш як 14 крылатымі і прынамсі 2 балістычнымі ракетамі.