Расіянка нарадзіла дзіця ў беларускім СІЗА, жанчыне пагражае да 10 гадоў турмы

Цяжарная расіянка прыехала ў Беларусі на шопінг — і трапіла ў СІЗА. Маладой жанчыне выстаўленае абвінавачанне ў “арганізацыі і (або) выкарыстанні заняткаў прастытуцыяй або стварэнні ўмоваў для заняткаў прастытуацыяй (ч. 2 арт. 171 КК РБ).

Як піша TUT.by, грамадзянку Расіі затрымалі на тэрыторыі Беларусі, куды яна прыехала набываць дзіцячыя рэчы. На момант затрымання яна была на 7-м месяцы цяжарнасці. Дзіця нарадзілася за кратамі і цяпер знаходзіцца ў Жодзінскім ізалятары разам з маці.

Адвакат, які прадстаўляе інтарэсы абвінавачанай, сцвярджае, што няма доказаў у здзяйсненні жанчынай дзеянняў, якія ёй інкрымінуюць: паводле абароны, яна не набывала беларускам квіткі на цягнік, не арандавала для іх жыллё і не займалася арганізацыяй сустрэчаў з кліентамі. Сама фігурантка справы кажа, што некалькі разоў размяшчала ў інтэрнэце абвесткі беларусак, якія аказваюць інтымныя паслугі ў Мінску, і рабіла гэта на просьбу саміх жанчынаў.

Не выключана, што расіянка была ўскосна ўцягнутая ў незаконную дзейнасць свайго мужа: ён папрасіў яе прыехаць у Мінск замест сябе, а як толькі жонку затрымалі, перастаў выходзіць на сувязь і дапамагаць ёй.

Беларускае заканадаўства прадугледжвае жорсткае пакаранне паводле такога абвінавачання — да 10 гадоў турмы. Абарона будзе настойваць на поўным апраўданні.

Разгляд судовай справы прызначаны на 26 лістапада ў судзе Цэнтральнага раёна Мінска.