Рабаўніка банка ў Магілёве асудзілі на 15 гадоў узмоцненага рэжыму
У Магілёве абвешчаны прысуд расіяніну Паўлу Цімафееву, які год таму абрабаваў аддзяленне Беларусбанка, піша tut.by. Яго прызналі вінаватым у разбоі з мэтай завалодання маёмасцю ў асабліва буйным памеры і захопе групы закладнікаў з карыслівых меркаванняў. Суд прызначыў яму пакаранне ў 15 гадоў калоніі ўзмоцненага рэжыму з канфіскацыяй маёмасці.
Акрамя таго, мужчына павінен кампенсаваць пацярпелым закладнікам маральную шкоду — па 5 тысяч рублёў кожнаму.
Пісталет Цімафеева знішчаць — ён, дарэчы, быў не баявым.
Мужчына не прызнаў на судзе сваю віну. Пракурор паведаміў, што Цімафееў нібыта заявіў пра свае добрыя намеры: маўляў, ён хацеў "прыцягнуць увагу праваахоўнікаў, што яны павінны быць гатовыя да такіх сітуацый".
