Прэм'ер Дональд Туск расказаў, як будзе ўзмацняцца польская армія

Прэм'ер Дональд Туск расказаў, як будзе ўзмацняцца польская армія. Яе колькасць плануецца давесці да 500 тысяч чалавек. Гэта не толькі кантрактнікі, але і рэзервісты.

"Яны таксама пройдуць інтэнсіўную падрыхтоўку, якая павінна дазволіць тым, хто не пойдзе ў армію, стаць паўнавартаснымі салдатамі ў выпадку ўзброенага канфлікту", — гаварыў Туск у Сейме, выступаючы з дакладам пра міжнародную сітуацыю і бяспеку Польшчы. Ён нагадаў, што колькасць украінскай арміі — 800 тысяч чалавек, а расійскай — 1,3 млн.

Польскі ўрад распрацоўвае праграму “маштабнай ваеннай падрыхтоўкі для кожнага дарослага мужчыны ў Польшчы”. Гатовая мадэль будзе ўжо да канца 2025-га. "Кожны здаровы мужчына ў Польшчы павінен хацець трэніравацца, каб мець магчымасць абараняць радзіму ў выпадку неабходнасці", — заявіў Дональд Туск.

"Сёння зусім ясна, што мы былі б у большай бяспецы, калі б мелі ўласны ядзерны арсенал. У гэтым няма ніякіх сумненняў", — сказаў польскі прэм'ер. А пакуль Варшава аналізуе прапанову французскага "ядзернага парасона" у Еўропе.

Польшча можа выйсці з канвенцый, якія забараняюць прымяненне супрацьпяхотных мін і касетных боепрыпасаў.