Пад Мазыром збудавалі дзясяткі агнявых кропак
У чаканні беспілотніка (ілюстрацыйнае фота) / t.me/modmilby/
Пад Мазыром каля вёскі Пянькі ў пачатку студзеня збудавалі дзясяткі агнявых кропак з мяшкоў з пяском, акопы, самаробныя шлагбаўмы, блок-пост і зямлянкі, піша "Беларускі Гаюн". Гэта ж пацвярджае і "Флагшток". Агнявыя кропкі з'явіліся ўздоўж трасы Р131, якая вядзе ад горада да Мазырскага нафтаперапрацоўчага завода. Байніцы ў іх накіраваныя менавіта ў бок Мазыра.
Каля згаданых абарончых збудаванняў заўважылі вайскоўцаў, пазначаных чырвоным скотчам. А яго ўжо працяглы час выкарыстоўваюць для ідэнтыфікацыі беларускіх вайскоўцаў каля мяжы з Украінай. Афіцыйна сцвярджаюцца, што вайскоўцы ўдзельнічаюць у "планавых вучэннях". Не выключана, што адпрацоўваецца і адбіццё нападу на НПЗ.
Мазырская газета супакойвае мясцовых жыхароў, якія бачаць ў прамзоне ўзброеных людзей: "гэта трэніроўка". Вайскоўцы "адпрацоўваюць пытанні, якія датычаць перакрыцця аўтамабільных шляхоў".
