Наталля Ладуцька адправіла палітвязням "пасылак больш чым на 500 кілаграмаў"
Наталля Ладуцька / Сацсеткі
Сталі вядомы дэталі крымінальнай справы супраць неабыякавай 60-гадовай мінчанкі, палітзняволенай Наталлі Ладуцька, якую жорстка пакаралі за дапамогу людзям за кратамі. У лютым яе асудзілі на 4 гады калоніі і штраф — больш за 25 тысяч рублёў. "Наша ніва" даведалася, што ж канкрэтна суддзя Яўген Пісарэвіч палічыў "злачынствам": "Бязвыплатныя пералічэнні грашовых сродкаў і адпраўленняў прадуктаў харчавання, прадметаў адзення, сродкаў асабістай гігіены і іншых прадметаў асобам, якія ўтрымліваюцца пад вартай і ў месцах выканання пакарання, звязанага з пазбаўленнем волі".
У справе згадваюцца 177 эпізодаў — гаворка ідзе пра грашовыя пераводы і пасылкі. Першае адпраўленне адбылося летам 2021-га, апошняе — у снежні 2023 года, за месяц да затрымання Ладуцька. Яна паспела пералічыць больш за 4000 рублёў і адправіла пасылак "больш чым на 500 кілаграмаў".
Наталля Ладуцька за кратамі са студзеня 2024-га. Цяпер яна ў Гомельскім СІЗА і чакае апеляцыі.
