МУС хоча ўвесці адказнасць за наўмыснае ўцягванне дзяцей у пратэсты

Міністэрства ўнутраных спраў хоча ўвесці адказнасць за наўмыснае ўцягванне дзяцей у пратэставую дзейнасць. Пра гэта расказаў першы намеснік міністра ўнутраных спраў — начальнік крымінальнай міліцыі Генадзь Казакевіч.

"Мы выступілі з ініцыятывай па ўвядзенні адміністрацыйнай адказнасці бацькоў за наўмыснае ўцягванне дзяцей у пратэсную дзейнасць, незаконныя масавыя мерапрыемствы. Гэта ўяўляе пагрозу не дзяржаве, а дзецям, якіх неразумныя бацькі спрабуюць да гэтай справы падвесці", — прыводзіць БЕЛТА словы міліцэйскага чыноўніка. 

Ён заявіў, што шмат бацькоў прыходзіць на акцыі разам з дзецьмі і часам "выключна цынічна" выстаўляюць іх перад міліцэйскімі кардонамі.

Таксама Казакевіч паведаміў, што МУС хоча зрабіць больш жорсткай адказнасць за ўдзел у незаконных масавых мерапрыемствах.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.