Мінскае "Дынама" перамагло БАТЭ. Дапамог суддзя

19 красавіка ў межах пятага тура Вышэйшай лігі былі згуляныя чатыры матчы. У Маладзечне мясцовы клуб пацярпеў разгромную паразу ад "Віцебска" — 0:4. "Маладзечна" прайграе пяты раз запар з пачатку чэмпіянату.

У Мінску "Арсенал" прымаў "Нёман" на штучным пакрыцці стадыёна на вуліцы Сямашкі. Гродзенцы ўпэўнена перамаглі — 2:0. Галоўны трэнер "Нёмана" Ігар Кавалевіч жорстка раскрытыкаваў якасць поля.

— Той футбол, што мы сёння бачылі, наўрад ці можна назваць футболам у поўным сэнсе слова. Гэта антыўмовы, у якіх складана нешта паказаць. Проста напярэдадні Вялікадня ў нас аказаліся мацнейшыя яйкі, і нам пашанцавала. Таму мы заслужылі гэтую перамогу, — сказаў Кавалевіч.

"Іслач" атрымала перамогу над "Нафтанам" — 3:0.

У цэнтральным матчы тура мінскае "Дынама" абыграла БАТЭ з лікам 2:1. 

Клубу з Мінска дапамог суддзя, які не прызначыў пенальці ў іх браму пасля гульні абаронцы высока паднятай нагой.

21 красавіка пяты тур завершыцца двума матчамі:

"МЛ Віцебск" — "Смаргонь"

"Дынама-Брэст" — "Тарпеда-БелАЗ"