Міграцыйнае агенцтва Швецыі пераглядае падыход да беларускіх заяўнікаў

Прадстаўнік Народнай амбасады Беларусі ў Швецыі Зміцер Васэрман пракаментаваў сітуацыю:

"Мы вельмі ўдзячныя дэпутатцы Карыне Эдэрбрынк за ўвагу да праблемы беларускіх уцекачоў. Упэўненыя, што ўрад і ўсе палітычныя партыі Швецыі падзяляюць жаданне забяспечыць справядлівы разгляд гэтых спраў. Аднак, на жаль, рэальнасць паказвае іншае. Прычыны крыюцца не ў злой волі, а ў адсутнасці разумення маштабаў драматычных зменаў у Беларусі пасля 2020 года. Наша краіна ператварылася ў дыстапічную дыгітальную тыранію, дзе штучны інтэлект выкарыстоўваецца для татальнага кантролю над грамадзянамі, іх актыўнасцю, сацыяльнымі сеткамі, асабістымі перапіскамі і нават думкамі. Спадзяемся, што справаздача Міграцыйнага агенцтва ліквідуе гэтыя недахопы".

Швецыя, вядомая сваім асцярожным падыходам, рэдка прадастаўляе міжнародную абарону беларусам. У выпадку адмовы ўцекачам загадваюць пакінуць краіну.

Нагадаем, у жніўні стала вядома пра затрыманне ў Беларусі мужчыны, якому міграцыйная служба Швецыі адмовіла ў прытулку. Пасля гэтага ў Швецыі распачалі расследаванне, звязанае з рашэннем дэпартаваць яшчэ двух беларусаў.