Мазырскі матацыкліст уцякаў ад ДАІ і перакуліўся
На аўтадарозе Бабруйск — мяжа Украіны мазырскі кіроўца спартовага матацыкла “Кавасакі” парушыў правілы абгону і пачаў уцякаць ад інспектараў ДАІ, ігнаруючы патрабаванні спыніцца. Пры гэтым лічбы нумарнога знака не прачытваліся, а твар немагчыма было разгледзець з-за шлема. На павароце ў вёску Тварычаўка матацыкліст не справіўся з кіраваннем і перакуліўся. Кіроўца не пацярпеў, паспрабаваў завесці матацыкл, але быў затрыманы.
Як паведамляе тэлеканал “Мазыр”, супраць матацыкліста складзена 11 пратаколаў. Яму пагражае штраф 18 мільёнаў і пазбаўленне правоў. Па лініі ДАІ мазырчук ужо 10 разоў за апошнія пяць гадоў прыцягваўся да адказнасці.
