Лукашэнка прапанаваў кожнай канфесіі ў Беларусі выбраць "найважнейшы храм"

Аляксандр Лукашэнка прапанаваў кожнай рэлігійнай канфесіі ў Беларусі выбраць "найважнейшы храм". І падказаў, што ў праваслаўных гэта могуць быць Жыровічы ў Слонімскім раёне Гродзенскай вобласці, у католікаў — Будслаў у Мядзельскім раёне Мінскай вобласці.

У панядзелак Лукашэнка сустракаўся з прадстаўнікамі рэлігійных канфесій Беларусі і прапанаваў стварыць "цэнтры прыцягнення" для кожнай канфесіі: "Мы павінны нашым рэлігіям, якія ў нас існуюць, стварыць адпаведныя цэнтры". Дзяржава, паводле яго слоў, гатовая "падставіць сваё плячо", дапамагчы. І нагадаў, што ў Жыровіцкім манастыры "праводзілася сур'ёзная рэканструкцыя".

"Разумееце, храмаў шмат. Але павінен быць найважнейшы храм, святыня, куды змогуць прыходзіць людзі не толькі з Беларусі, не толькі нашы суседзі, але і з далёкага замежжа, — гаварыў на сустрэчы Аляксандр Лукашэнка. — Таму падумайце і ўнясіце прапановы. Мы разам з грамадствам, народам (я думаю, яны падтрымаюць такую ідэю, таму што гэта ідэя на адзінства) створым такія цэнтры прыцягнення нашых вернікаў, да якой бы канфесіі яны ні належалі. Вы аднолькава ўсе дарагія для дзяржавы, для мяне, і я буду рабіць усё для таго, каб вы, як сёння, жылі ў міры і згодзе".