Хакейны клуб "Дынама-Мінск" узначаліць канадзец Гордзі Дуаер — былы тафгай
Канадскі спецыяліст Гордзі Дуаер узначаліць хакейны клуб "Дынама-Мінск". Як паведамляе прэс-служба сталічнага клуба, з трэнерам дасягнутая папярэдняя дамоўленасць аб падпісанні пагаднення.
Дуаеру 39 гадоў. У сезонах 2015/16 — 2016/17 ён узначальваў харвацкі "Медвешчак". Таксама спецыяліст уваходзіў у трэнерскі штаб зборнай Канады, якая выйграла Кубак Шпэнглера ў 2016 годзе. Таксама ён узначальваў швейцарскі клуб "Амбры-Піёта", быў асістэнтам галоўнага трэнера юнацкай (U18) зборнай Канады.
У якасці гульца Дуаер правёў 108 матчаў у НХЛ за "Тампу", "Нью-Ёрк Рэйнджэрс" і "Манрэаль". Таксама гуляў у АХЛ, Швецыі ды Нямеччыне.
Як піша by.tribuna.com, падчас сваёй гульцовай кар'еры Дуаер быў сапрашдным тафгаем. У 108 матчах, праедзеных у НХЛ, ён правёў 41 бой і быў аштрафаваны на 394 хвіліны.
У 2000 годзе хакеіста дыскваліфікавалі на 23 (!) матчы, бо ён пакінуў лаву штрафнікоў і палез у бойку з суддзямі, заадно абражаючы іх.
Папярэднікам Дуаера на пасадзе галоўнага трэнера "зуброў" быў яго суайчыннік Крэйг Вудкрафт. Кантракт з ім клуб датэрмінова скасаваў 23 чэрвеня. Вудкрафт ужо знайшоў сабе новую працу ў Швецарыі: ён падпісаў трохгадовы кантракт з “Жэневай-Серветам”.
