Гомельскі ліхач зладзіў пагоню ад ДАІ і ўрэзаўся ў патрульны аўтамабіль (фота)

Кіроўца-ліхач у Гомелі ўцякаў ад ДАІ і спыніўся толькі тады, калі ўрэзаўся ў службовую патрульную машыну.

Здарэнне адбылося позна ўвечары 15 верасня, інфармуе БЕЛТА. Экіпаж ДПС на праспекце Касманаўтаў паспрабаваў спыніць аўтамабіль "Міцубісі Кольт". Аднак кіроўца толькі павялічыў хуткасць і кінуўся наўцёк. Каб не даць даішнікам абагнаць сябе, ён нават выязджаў на паласу сустрэчнага руху.

Да пагоні далучыліся яшчэ дзве машыны ДАІ. І трыма аўтамабілямі яны змаглі блакаваць парушальніка на ўзбочыне. Пабачыўшы, што да яго аўто бягуць дашнікі, кіроўца ірвануў з месца і ўрэзаўся ў машыну ДПС, пасля чаго яго затрымалі.

Высветлілася, што за рулём быў 18-гадовы гамяльчук. Два месяцы таму яго ўжо затрымлівалі за кіраванне ў нецвярозым стане. Тады хлопца штрафавалі больш як на 10 мільёнаў рублёў. Таксама яго пазбавілі права кіравання аўто на тры гады, хоць і да гэтага ён не атрымоўваў пасведчанне кіроўцы.

Цяпер на парушальніка склалі шэсць адміністрацыйных пратаколаў. Акрамя таго, на яго збіраюцца пачаць крымінальную справу за кіраванне аўтамабілем у нецвярозым выглядзе паўторна на працягу года.

Фота з сацыяльных сетак