Фільм беларускага рэжысёра пакажуць на найбуйнейшым кінафестывалі Польшчы

Рэжысёр Юрый Сямашка паведаміў на сваёй старонцы ў Facebook, што яго фільм "Лебядзіная песня Фёдара Озерава" будзе паказаны на польскім кінафестывалі "Новыя гарызонты".

Паказы адбудуцца 20, 24 і 25 ліпеня ў кінатэатры Вроцлава. Акрамя таго, з 17 ліпеня па 3 жніўня карціну можна будзе паглядзець анлайн на сайце фестывалю, дадае канал "Свяшчэнны Белавуд".

"Новыя гарызонты" — найбуйнейшы кінафестываль Польшчы і адзін з найважнейшых фестываляў на карце Цэнтральнай Еўропы. Яго мэта — знаёміць гледачоў з самымі незвычайнымі, інавацыйнымі і арыгінальнымі фільмамі з усяго свету.

Менавіта на гэтым фестывалі адбудзецца польская прэм’ера фільма маладога беларускага рэжысёра.

Нагадаем, раней гэтая карціна была прадстаўлена ў па-за конкурснай праграме Берлінале-2025 і атрымала дыплом ад чытацкага журы газеты Tagesspiegel.

Пра што фільм?

Сюжэт фільма наступны: за некалькі дзён да Новага года 25-гадовы музыкант Фёдар Озераў вяртаецца дадому пасля доўгага падарожжа. Фёдар засяроджаны на тым, каб сабраць гурт і напісаць новы матэрыял. Аднак яму не ўдаецца сабраць музыкаў, бо ўсе вакол занепакоены пагрозай Трэцяй сусветнай вайны, якая, паводле чутак, можа пачацца 1 студзеня. Нягледзячы на ўсеагульную паніку, Фёдар не губляе самакантролю і настроены працаваць над новымі песнямі.

Аднак яго планы змяняюцца, калі ён заўважае, што знік яго любімы світар з рамонкавым узорам. Ён верыць, што гэты світар надзяляе яго магічнымі здольнасцямі пісаць песні, як гэта было з яго папярэднім уладальнікам — рок-зорай. Фёдар адпраўляецца ў духоўнае падарожжа, каб адшукаць світар і напісаць новую песню да Новага года.

Хто такі Юрый Сямашка?

Рэжысёр Юрый Сямашка вядомы найперш як аўтар незалежных праектаў: "Смеццевая галава", "Калі я быў генералам", "Кроў і караоке". Яго працы атрымлівалі прызнанне на беларускіх кінафестывалях, а беларуская прэмія кінакрытыкаў "Чырвоны верасень" адзначыла яго працу "Смеццевая галава".

"Лебядзіная песня Фёдара Озерава" была створана ў 2023 годзе ў рамках Інкубатара мікрабюджэтнага кіно арганізацыі Belarusian Filmmakers Network і атрымала падтрымку на конкурсе Work-in-Progress у Котбусе.