Эпоха перад вайной. Як паўза ў баявых дзеяннях ва Украіне паўплывае на Беларусь

— Калі баявыя дзеянні ва Украіне спыняцца, галоўны пазітыўны момант для Беларусі будзе ў тым, што верагоднасць уцягвання нашай краіны ў вайну знізіцца. Прынамсі, на пэўны момант.  

Пра гэта ў размове з Еўрарадыё кажа палітычны аглядальнік Аляксандр Фрыдман.

Эксперт нагадвае, што Беларусь — гэта прыфрантавая краіна, якая стаіць на расійскім баку і чые рэсурсы выкарыстоўвае Расія. Таму ўцягванне яе ў паўнамаштабную вайну, калі беларускія вайскоўцы будуць ва Украіне, а баявыя дзеянні будуць весціся нават на нашай тэрыторыі — па-ранейшаму застаецца цалкам верагодным сцэнаром.

— І спыненне баявых дзеянняў паміж Расіяй і Украінай не выключае яго, але робіць менш верагодным, — кажа Аляксандр Фрыдман. — Далей узнікае пытанне, якімі будуць стасункі паміж Расіяй і ЗША, а таксама паміж Расіяй і Еўропай. Паколькі Беларусь — гэта краіна паміж Расіяй і Захадам. Калі, напрыклад, пачнецца збліжэнне Расіі і ЗША, Лукашэнка можа стаць такім маленькім партнёрам і для новай амерыканскай адміністрацыі — калі, натуральна, ён зможа зацікавіць амерыканцаў.

Але можа стацца і так, што нічога ў гэтым накірунку не адбудзецца і стасункі паміж Вашынгтонам і Масквой радыкальна не палепшацца. У той жа час мы разумеем, што стасункі паміж Расіяй і Еўропай відавочна не палепшацца. Бо спыненне баявых дзеянняў ва Украіне на любых умовах, якія цяпер абяркоўваюцца — гэта не пачатак пасляваеннай эпохі, а прадваенная эпоха. Эпоха перад вайной, якая наступае.

Гэта новы перыяд халоднай вайны паміж Еўропай і Расіяй, і ў гэтай халоднай вайне Беларусь відавочна апынецца на расійскім баку. Так што ў гэтым сэнсе сітуцацыя для Беларусі відавочна не палепшыцца, хаця ў прынцыпе — сёння мы маем фактычна тую ж самую сітуацыю.