Экс-кандыдата ў прэзідэнты Румыніі Джарджэску адпусцілі пасля допыту

Затрыманага экс-кандыдата ў прэзідэнты Румыніі Каліна Джарджэску адпусцілі пасля допыту ў Генпракуратуры краіны, паведамляюць румынскія СМІ. Але на працягу 60 дзён палітык застанецца пад судовым кантролем. Сярод іншага гэта азначае, што яму забаронена пакідаць краіну.

Джарджэску вінавацяць па шасці пунктах: 
— заклікі да дзеянняў, накіраваных супраць канстытуцыйнага ладу;
— паведамленне ілжывай інфармацыі;
— падача лжывых дэкларацый у пастаяннай форме (наконт крыніц фінансавання выбарчай кампаніі і дэкларацый аб маёмасці);
— ініцыяванне або стварэнне арганізацыі фашысцкага, расісцкага або ксенафобскага толку, далучэнне да такой групы ці падтрымка яе ў любой форме;
— публічная прапаганда культу асоб, вінаватых у здзяйсненні генацыду, ваенных злачынствах і злачынствах супраць чалавечнасці, і публічная прапаганда фашысцкіх, легіянерскіх, расісцкіх або ксенафобскіх ідэй, канцэпцый або дактрын;
— ініцыяванне ці стварэнне антысеміцкай арганізацыі, далучэнне да такой арганізацыі ці падтрымка яе ў любой форме.

Джарджэску затрымалі 26 лютага і даставілі на допыт у Генпракуратуру.

У лістападзе 2024-га у першым туры прэзідэнцкіх выбараў у Румыніі Джарджэску атрымаў большасць галасоў. 6 снежня Канстытуцыйны суд краіны ануляваў вынікі першага тура выбараў. Падставай паслужылі заявы спецслужбаў пра "гібрыдную атаку" на Румынію з боку Расіі.