Два беларусы з Віцебска, якія ваявалі за Расію, трапілі ў палон УСУ
Палонныя беларусы / t.me/supernova_plus
У палон да байцоў УСУ трапілі яшчэ два беларусы, якія ваявалі на расійскім баку. Відэа з імі з'явілася ў тэлеграм-канале Supernova+ зранку 31 сакавіка.
На відэа бачна, што абодвум мужчынам заклеілі вочы клейкай стужкай. Адзін з іх кажа, што ён родам з Віцебска. Мужчына прызнаецца, што ваяваў за Расію за 200 тысяч расійскіх рублёў (каля 2350 долараў).
Пад відэа напісана: "1514... Узялі беларускіх наймітаў з Віцебска... Цыгарэтку падкурваем. Пяшчотна хамім".
Як мяркуе сайт "Зеркало", лік 1514 можа ўказваць на спецпадраздзяленне беларускіх добраахвотнікаў "1514" у складзе Галоўнага ўпраўлення разведкі Мінабароны Украіны.
Раней паведамлялася таксама пра грамадзяніна Беларусі Сяргея Шустава, які трапіў у палон да ўкраінцаў. У мужчыны — сем судзімасцяў за крадзяжы. На фронт яго адправілі з расійскай калоніі.
Такім чынам, колькасць беларусаў, якія знаходзяцца ва ўкраінскім палоне, вырасла да сямі чалавек.
