Беларусы сёння адзначаюць Дзень герояў
Слуцкія паўстанцы / Вікіпедыя
27 лістапада беларусы адзначаюць Дзень герояў. Гэта неафіцыйнае свята ў гонар Слуцкага збройнага чыну (Слуцкага паўстання).
У лістападзе 1920 года Рада Случчыны абвясціла ў Слуцку і наваколлі ўладу Беларускай Народнай Рэспублікі і стварыла два палкі для яе абароны. 26-27 лістапада слуцкія паўстанцы прынялі першы бой з бальшавіцкімі войскамі. Баі паўстанцаў супраць бальшавікоў працягваліся месяц, пры канцы снежня яны перайшлі польска-савецкую мяжу і былі раззброеныя польскімі ўладамі. Паўстанцы, якія пазней вярнуліся пад уладу Саветаў, былі рэпрэсаваныя.
На пачатку 1990-х з ініцыятыве БНФ у вёсках Грозава, Семежава (Капыльскі раён) і Чырвоная Слабада (Салігорскі раён) былі пастаўленыя памятныя крыжы ў гонар паўстанцаў. Менавіта з гэтымі вёскамі звязаныя асноўныя падзеі Слуцкага паўстання.
Афіцыйныя ўлады гэтае свята ігнаруюць.
