Беларуска перамагла на чэмпіянаце Польшчы па стральбе з лука
Карына Казлоўская заняла першае месца / instagram.com/kazlouskaya.karyna/
Беларуска Карына Казлоўская перамагла на чэмпіянаце Польшчы па стральбе з лука. Турнір нядаўна прайшоў у Закапанэ. Казлоўская стартавала пасля вялікага перапынку, прычым упершыню — у статусе польскай грамадзянкі (пашпарт яна атрымала ў студзені 2025 года), піша "Трыбуна".
Карыне Казлоўскай 24 гады. Яна неаднаразовая чэмпіёнка Беларусі, на Алімпіядзе ў Токіа разам з камандай заняла 4-е месца. У 2020-м падпісвала ліст беларускіх спартоўцаў супраць гвалту сілавікоў і за новыя выбары ў Беларусі. Пра тое, што лучніца сышла са зборнай і з'ехала за мяжу, стала вядома ў 2022 годзе.
"Нягледзячы на атрыманне польскага грамадзянства, у душы я ўсё роўна застаюся беларускай", — кажа спартоўка.
Казлоўская працуе ў краме прадавачкай і адначасова вучыцца на другім курсе Вышэйшай эканоміка-гуманітарнай школы на перакладчыцу з англійскай на польскую мову.
