Аб’ёмы экспарту з Беларусі на акупаваныя тэрыторыі Украіны патроіліся

У 2024 годзе беларускія прадпрыемствы адправілі на акупаваныя тэрыторыі Украіны 4 260 тон грузаў, што адпавядае 66 чыгуначным вагонам, паведамляе “Супольнасць чыгуначнікаў Беларусі”. У сярэднім гэта складала 355 тон і 5,5 вагона ў месяц.

Аднак ужо ў першым квартале 2025 года экспарт дасягнуў 2 626 тон — 47 вагонаў за тры месяцы. Сярэднямесячны паказчык рэзка вырас да 875,3 тоны і 15,7 вагона.

У параўнанні з 2024 годам, аб’ёмы экспарту ў пачатку 2025 года павялічыліся амаль у тры разы як па масе, так і па колькасці вагонаў.

Сярод найбуйнейшых пастаўшчыкоў — ААТ "Беларуськалій", ААТ "Спецжалезабетон", РУП "СГ-ТРАНС", лясгасы і Мазырсоль. Адзначана таксама адпраўка прадукцыі для патрэб ваенных аб’ектаў Расіі ў Крыме.

Галоўным атрымальнікам грузаў з Беларусі з’яўляецца ТАА "Флоранс".

Сярод беларускіх кампаній, што атрымліваюць грузы з тэрыторый, непадкантрольных Кіеву, фігуруюць:

• ЗАТ "Асіповіцкі завод транспартнага машынабудавання" (АЗТМ);

• ААТ "БЕЛАЗ";

• ААТ "Керамін";

• ААТ "Мінскі аўтамабільны завод";

• ААТ "Пухавіцкі вопытна-эксперыментальны завод";

• ААТ "Гомельбудматэрыялы";

• ААТ "Скідзельскі цукровы камбінат";

• ЗТАА "Омск Карбон Магілёў";

• АДА "Металургічная кампанія Прамбудметал" і іншыя.

Асноўную масу грузаў складалі металапрадукцыя — сталь, балкі, швелеры, і сыравіна — каалін, кокс, смалы.

Экспарцёрам з акупаваных украінскіх тэрыторый выступала ўсё тое ж ТАА "Флоранс".