Зяленскі: Пуцін хоча ўтапіць Украіну ў крыві сваіх салдат

Украінскі прэзідэнт Уладзімір Зяленскі ў інтэрв'ю Bild пракаментаваў аб'яўленую ў Расіі частковую мабілізацыю: Уладзімір Пуцін "хоча ўтапіць Украіну ў крыві, але таксама і ў крыві сваіх уласных салдат".

Зяленскі заявіў, што правядзенне частковай мабілізацыі ў РФ паказвае наяўнасць у расіян праблем у войску, у тым ліку і з афіцэрамі. Ён расказаў пра гібель у баях расійскіх курсантаў, якія не паспелі скончыць навучанне і былі кінутыя на фронт. "Яны прыходзяць да нас паміраць", — кажа Зяленскі.

Прэзідэнт Украіны не збіраецца адмяняць дэакупацыю акупаваных Расіяй тэрыторый у сітуацыі правядзення там расіянамі "рэферэндумаў". "Мы крок за крокам будзем дзейнічаць у адпаведнасці з нашымі планамі, — заявіў Уладзімір Зяленскі. — Я ўпэўнены, што мы вызвалім нашу тэрыторыю".

Што да ядзернага шантажу з боку Пуціна, то прэзідэнт Украіны не верыць, што расійскі прэзідэнт зможа выкарыстаць гэтую зброю: "Я не думаю, што свет дазволіць яму яе выкарыстаць". Пры гэтым Зяленскі прызнае, што пагроза ядзернага ўдару Расіі ёсць. Аднак ён заклікае не паддавацца на пагрозы Уладзіміра Пуціна.