Зяленскі гатовы пайсці ў адстаўку па заканчэнні вайны

Уладзімір Зяленскі гатовы пакінуць сваю пасаду па заканчэнні вайны. "Мая мэта — скончыць вайну, а не працягваць балатавацца на выбарах", — заявіў прэзідэнт Украіны ў інтэрв'ю выданню Axios.

У гутарцы з журналістам выдання Зяленскі паведаміў, што гатовы звярнуцца да Вярхоўнай Рады з просьбай правесці выбары, калі будзе дасягнуты рэжым спынення агню.

Аднак ён падкрэсліў наяўнасць пэўных перашкодаў. Перш за ўсё Зяленскі назваў сітуацыю з бяспекай у шэрагу рэгіёнаў краіны і палажэнні Канстытуцыі Украіны. Асноўны закон краіны наўпрост забараняе правядзенне выбараў у перыяд ваеннага становішча.

Тым не менш прэзідэнт Украіны заявіў, што правесці іх можна.