Зноў аранжавы ўзровень у Беларусі — прагноз на чацвер
Залева, ілюстрацыйнае фота / "Мінск-Навіны"
У чацвер, 10 ліпеня, у Беларусі чакаецца воблачнае з праясненнямі надвор'е, паведамляе Белгідрамет.
На большай частцы тэрыторыі краіны пройдуць дажджы, уначы месцамі чакаюцца моцныя дажджы і навальніцы. Удзень у многіх раёнах прагрымяць навальніцы, пры навальніцах месцамі пройдуць моцныя залевы. Вецер прагназуецца пераменных кірункаў парывісты, удзень пры навальніцах месцамі чакаецца шквалістае ўзмацненне ветру да 15-20 метраў за секунду.
У Мінску чакаецца навальніца.
Тэрмометры ўначы пакажуць 13-19 градусаў вышэй за нуль. Удзень будзе ад +16 па паўночным захадзе да +34 градусаў па ўсходзе Беларусі.
Дажджы з навальніцамі чакаюцца таксама і 11-12 ліпеня. Кантрасная тэмпература ад 16 да 32 градусаў цяпла ў пятніцу ўдзень яшчэ захаваецца. А вось у суботу прагназуюць ужо больш роўны тэмпературны фон — 19-26 градусаў са знакам "плюс".
