З хакейнага мінскага “Дынама” сыходзіць канадзец Мэт Элісан

З хакейнага мінскага “Дынама” сыходзіць канадзец Мэт Элісан. Прэс-служба клуба сцвярджае, што ён сам папрасіў датэрмінова скасаваць кантракт (нібыта, звярнуўся яшчэ пасля заканчэння сезона) і супрацоўніцтва было спынена “па пагадненні бакоў”. ХК “Дынама-Мінск” падзякаваў Элісану “за плённае супрацоўніцтва” і пажадаў поспехаў у далейшай кар’еры.

Элісану 33 гады. Ён — нападаючы. Гуляў у Канадзе і ЗША, у Еўропе — з 2008 года, выступаў за рыжскае “Дынама”, ХК МУС, “Тарпеда” з Ніжняга Ноўгарада, “Біль”, “Мядзвяшчак”. У мінскім “Дынама” ён быў з 2014 года. У мінулым сезоне ў 54 матчах Мэт Элісан закінуў 16 шайбаў, зарабіў 33 асістэнцкія балы. Ён стаў лепшым бамбардзірам каманды.

Як вядома, нядаўна Аляксандр Лукашэнка неаднаразова крытычна выказваўся пра сітуацыю ў беларускім хакеі і ў мінскім "Дынама", у прыватнасці. Было агучана, што ў камандзе не павінна быць легіянераў, альбо іх колькасць трэба звесці да мінімуму. Старшыня федэрацыі хакея Сямён Шапіра прапанаваў пакінуць трох чалавек-легіянераў. Як бачым, Элісан у іх лік не ўвайшоў.