Віцебскіх медыкаў асудзілі за знішчэнне тысяч вакцын ад COVID-19

Пяцярых жыхарак Віцебска асудзілі за знішчэнне тысяч вакцын ад каранавіруса, паведамляе абласная пракуратура. Як удакладняе канал "Віцебск, я гуляю", гаворка ідзе пра гарадскую паліклініку №6.

Намесніца загадчыка паліклінікі і старшая медсястра перавысілі службовыя паўнамоцтвы. Яна незаконна загадалі траім падначаленым ім медсёстрам знішчыць рэшткі вакцыны супраць каранавіруса COVID-19, у якіх яшчэ не скончыўся тэрмін прыдатнасці. Пры гэтым прадстаўнікі адміністрацыі даручылі запісаць ва ўліковыя і справаздачныя дакументы, што вакцына была выкарыстаная падчас вакцынацыі.

"Усяго было знішчана не менш за 6 тысяч вакцын коштам не менш за 120 тысяч рублёў. У судовым пасяджэнні абвінавачаныя прызналі віну ў поўным аб'ёме", — заяўляюць у пракуратуры.

Жанчыны чыстасардэчна раскаяліся ў зробленым і прынялі меры па кампенсацыі шкоды дзяржаве. Тым не менш суд Чыгуначнага раёну Віцебска прызначыў намесніцы загадчыка паліклінікі і старшай медсястры па 3 гады і 6 месяцаў "хатняй хіміі". Траім медсёстрам прысудзілі па два гады "хатняй хіміі".

Віцебскі тг-канал называе імёны траіх асуджаных — намесніца загадчыка Ірына Кочава, старшая медсястра Святлана Савіцкая, медсястра Марына Когаль.

Дарэчы, у Віцебску гэта ўжо другі прысуд з нагоды знішчэння вакцын. Летась медработніцу за знішчэнне 4,5 тысячы вакцын асудзілі на пяць гадоў пазбаўлення волі з адтэрміноўкай на тры гады.