У пракуратуры сказалі, чаму фільм пра сталінскія расстрэлы стаў "экстрэмісцкім"

Пракуратура Гомельскай вобласці патлумачыла, чаму "экстрэмісцкім" прызналі фільм "Лес" пра сталінскія рэпрэсіі ў Гомелі. На думку работнікаў пракуратуры, стужка "абвяргае злачынствы фашыстаў у гады Вялікай Айчыннай вайны".

Дарэчы, тлумачэнне пракуратуры з'явілася праз месяц пасля прызнання стужкі "экстрэмісцкай" і супала з чарговай гадавінай смерці Сталіна.

Фільм "Лес" грунтуецца на некалькіх рэальных гісторыях 1930-х гадоў. У ім расказваецца аб расстрэлах у Навабеліцкім лесе пад Гомелем. У прыватнасці, пра чыноўніка, які перажыў расстрэл і здолеў незаўважна выбрацца з ямы. У дакументальна-мастацкай стужцы зняліся акторы зорнай трупы Купалаўскага тэатра, якія былі вымушаныя эміграваць.

Раскопкі, якія праводзіліся ў Навабеліцкім лесе ў 1990-х, выявілі, што там супрацоўнікі НКУС расстрэльвалі савецкіх грамадзянаў. Але ў 2021 годзе раскопкі ў лесе правёў 52 пошукавы батальён Мінабароны Беларусі. Пасля гэтага чыноўнікі сфармулявалі новую версію: у лесе знаходзяцца парэшткі ахвяраў нацыстаў. Гэтая версія зручна кладзецца ў расследаванне "генацыду беларускага народу", якім Генпракуратура занялася пасля 2020 года.

У пракуратуры кажуць, што інфармацыю пра відэа "Выжыў пасля расстрэлу. Дакументальны фільм "Лес" атрымалі ад іншых сілавікоў. На думку пракурораў, стваральнікі кінастужкі "катэгарычна адмаўляюць вынікі расследавання распачатай у красавіку 2021 года генеральным пракурорам Рэспублікі Беларусь крымінальнай справы аб генацыдзе беларускага народа ў гады Вялікай Айчыннай вайны і пасляваенны перыяд".

Таксама ў пракуратуры заяўляюць аб "праявах экстрэмізму" ў фільме. Іх нібыта выявіла Гомельская абласная камісія па правядзенні ацэнкі сімволікі, атрыбутыкі, інфармацыйнай прадукцыі.

Дарэчы, за сцвярджэнне, што ў Чонкаўскім лесе пад Гомелем ляжаць парэшткі ахвяр сталінскіх рэпрэсій, у 2023 годзе ліквідавалі аб'яднанне гомельскіх пашукавікоў "Памяць Айчыны".