У Польшчы часова забараняюць перадаваць пасылкі цягніком
Пасылка, ілюстрацыйнае фота / pexels.com
У Польшчы адмяняюць перадачу пасылак праз праваднікоў цягніка — так званых кандуктарскіх адпраўленняў. Такое рашэнне прынятае ў сувязі з увядзеннем трэцяга ўзроўню тэрарыстычнай пагрозы Charlie, паведамляе PKP Intercity. Прычынай сталі дыверсіі на чыгунцы.
Як адзначае выданне MOST, перадача кандуктарскіх пасылак прыпыняецца з 22 лістапада на нявызначаны тэрмін — да адмены рашэння.
Пры гэтым пад забарону не трапіць дастаўка жыццёва важных лекаў, прэпаратаў крыві, а таксама біялагічных матэрыялаў.
Дыверсіі на чыгунцы паміж Варшавай і люблінам адбыліся 16 лістапада. У арганізацыі тэрактаў падазраюць двух грамадзян Украіны, якія дзейнічалі на замову расійскіх спецслужбаў. Паведамляецца, што пасля дыверсіі яны пакінулі Польшчу, выехаўшы ў Беларусь.
