У Кіеве сёння пахавалі загінулую беларускую добраахвотніцу Марыю Зайцаву

Сёння ў Кіеве пахавалі загінулую беларускую добраахвотніцу Марыю Зайцаву.

Дзяўчына загінула ў баях пад Пакроўскам, змагаючыся ў шэрагах Другога інтэрнацыянальнага легіёна УСУ. Яна будзе пахаваная на кіеўскіх могілках, дзе пахаваныя іншыя беларускія добраахвотнікі.

Офіс Святланы Ціханоўскай дапамог выканаць пісьмовую волю Марыі наконт формы пахавання, распавяла Крысціна Шыянок.

"За дзве гадзіны да развітання з Марыяй Зайцавай яны па маёй просьбе звярнуліся ў адміністрацыю горада Кіева. <...> Таму пасля развітання за некалькі мінут да пачатку замоўленай вайсковай часткай крэмацыі апошняя была скасаваная. Беларуская добраахвотніца Марыя Зайцава, першая беларуска, якая загінула, абараняючы незалежнасць Украіны і будучую свабоду Беларусі, будзе пахаваная не толькі там, дзе яна хацела, але і ТАК, як яна хацела", — напісала Шыянок. 

Марыя Зайцава нарадзілася і вырасла ў Гомелі, распавядае яе гісторыю DW. Скончыла гімназію, валодала французская і англійскай мовамі, вучылася на ветэрынара. Яна была параненая гумовымі кулямі і светлашумавой гранатай падчас пратэстаў у Беларусі, 9 жніўня 2020 года. Пасля гэтых падзеяў яна амаль страціла слых на адно вуха. Яна перанесла некалькі аперацый у Беларусі, а пасля з'ехала лячыцца ў Чэхію.

Пасля курса рэабілітацыі дзяўчына засталася ў Чэхіі, планавала атрымліваць сярэднюю медычную адукацыю. Але вайна перакрэсліла гэтыя планы, і ўвесну 2023 года беларуска прыехала ва Украіну.