У Беларусі выдалі больш за 27 тысяч генетычных пашпартоў здароўя
Генетычныя пашпарты / БЕЛТА
У Беларусі выдалі больш за 27 тысяч генетычных пашпартоў здароўя (выдача пачалася ў 2010 годзе). Яны з'яўляюцца "неабходным складнікам так званай персаналізаванай медыцыны, якая заснавана на індывідуальных асаблівасцях кожнага пацыента". Пра гэта на прэс-канферэнцыі ў Мінску паведаміў намеснік дырэктара па навуковай дзейнасці Інстытута генетыкі і цыталогіі Нацыянальнай акадэміі навук Беларусі Павел Марозік. Паводле яго слоў, айчынныя навукоўцы правялі "больш за 400 тысяч розных генетычных аналізаў". Сумесна з медыкамі былі распрацаваны методыкі выяўлення генетычнай схільнасці да больш чым 20 розных захворванняў чалавека. Разам з РНПЦ "Кардыялогія" вывучаліся генетычныя прычыны спадчынных формаў сардэчна-сасудзістых паталогій. І быў устаноўлены "пералік, спектр мутацый, якія характэрныя для беларускіх пацыентаў з гэтай паталогіяй".
Прадстаўнік НАН падкрэслівае, што ўсе даследаванні праводзяцца беларускімі навукоўцамі самастойна, за мяжу біялагічны матэрыял не перадаецца, гарантуецца "захаванасць, канфідэнцыяльнасць персанальных даных".
