У баях на Данеччыне ва ўкраінскі палон трапіў яшчэ адзін беларус

Ва ўкраінскі палон трапіў яшчэ адзін грамадзянін Беларусі, які ваяваў на баку расійскіх акупантаў. Гэта адбылося падчас баёў каля паселішча Пятроўка Данецкай вобласці на пакроўскім кірунку.

У дзяржаўным украінскім праекце "Хачу жыць" журналістам Радыё Свабода ўдакладнілі, што ў траўні ў палон трапіў Сяргей Кузьменка. Да падпісання кантракту з расійскім войскам ён жыў у горадзе Яраслаўлі, але мае беларускі пашпарт. Ваяваў стралком у другім батальёне 102 мотастралковага палка 150-й дывізіі. Пасля баёў пад Марыупалем гэтую дывізію давялося фактычна цалкам аднаўляць.

Паведамляецца, што Кузьменка нарадзіўся 22 ліпеня 1971 года, служыў у званні шараговага. У Беларусі жыве ягоная 81-гадовая маці Лідзія Кузьменка.

Цяпер ва ўкраінскім палоне знаходзяцца восем нашых суайчыннікаў. Падчас найбольшага за апошні час абмену Украіна перадала Расіі трох палонных беларусаў — Дзмітрыя Ананчыка з Мінска, Аляксея Чарнышова і Сяргея Мірончыка. Паводле заяваў прэзідэнта Украіны Уладзіміра Зяленскага, расійскі бок адмаўляецца мяняць беларусаў, якія ваявалі на ўкраінскім баку і трапілі ў палон.